وجه النجم محمد هنيدى رسالة قوية لمن يقلل من قدر النجم محمد صلاح لاعب ليفربول الإنجليزى ومنتخب مصر، وذلك بعد هزيمة فريقه نهائي دورى أبطال أوروبا أمام ريال مدريد الإسباني.

وكان ريال مدريد قد توّج بلقب دوري أبطال أوروبا على حساب ليفربول، بعد الفوز بهدف نظيف، في المباراة التي أقيمت بينهما مساء السبت على ملعب "دو فرانس" بالعاصمة الفرنسية باريس.
 
وكتب هنيدي منشوراً قال فيه: "عارف لما بتبقى بتلعب بلاعب فى البلاى ستشين وفجأة تلاقيك بتنافسه أو اللاعب بعد ما اعتزل بيحلل أداءك فى التلفزيون وبيوصفك بالأفضل فى منطقتك فى العالم".
 
وأضاف هنيدى: "عشان كدة بقى عايز أقول حاجة، بقالى فترة بشوف "بعض" الشباب اللى بيحاول يسخر أو يقلل من صلاح، يمكن يكونوا مابيحبوش صلاح أو بيشجعوا فرق منافسة، من حقك ماتحبش صلاح وحقك تحب فريق منافس وتشجعه، بس الفكرة ليه تقلل أو تكره واحد قدر يعمل اللى ملايين كانوا بيشوفوه مستحيل".
 
وتابع الفنان الكوميدي: "صلاح اللى كان بيسافر بالقطار كل يوم وينام فى النادى على الأرض وبدون واسطة قدر يصنع نفسه من الصفر، لغاية لما وصل أنه بقى ينافس على الأفضل فى العالم، صلاح زينا وشبهنا، ماتولدش فى بقه معلقة دهب، وقدر يكون مثال لأى واحد بيتعب وشايف أن حلمه وهدفه مستحيل يتحقق".
 
وواصل: "صلاح مثال لأى شخص مجتهد وبيمر بظروف صعبة وحياة صعبة، مثال إنك تقدر مش بس تكون الأفضل فى بلدك تكون الأفضل فى العالم، الفكرة مش فى الشخص الفكرة فى الفكرة نفسها، أن يكون عندنا شخص وأشخاص طبعا فى مجالات كتير تانية زيه، قدروا يحققوا اللى انت واحنا كنا شايفينه مستحيل، فالحب والتقدير لصلاح مش حب لشخص، حب لفكرة ونجاح، وهاردلك لصلاح".