الراسل: أشرف فايز

صوت الجماهير.. طالبة التغيير
افهم يا شرف.. اسمع يا مشير
صوت الجماهير
صوت الجماهير صرخه تنادي
الدم دا.. دم أولادي
سفكوه علشانك يا بلادي
علشان تعيشي ف أمن وخير
صوت الجماهير
صوت الجماهير وف كل مكان
في إسكندرية ولا أسوان
جرس كنيسة ويا أدان
الكل واقف ف التحرير
صوت الجماهير

صوت الجماهير طالع نازل
لا بينافق ولا بيغازل
طالبين حقوقنا بالعاجل
وسؤالنا طب ليه التأخير
صوت الجماهير
صوت الجماهير صوتي وصوتك
صوت الجماهير رافضة سكوتك
من كانوا سبب موتي وموتك
نايمين على ريش نعام وحرير
صوت الجماهير

صوت الجماهير مش هايسلم
ومهما شاف ويل واتألم
خلاص من الماضي اتعلم
والسر ماعدشي ف جوه البير
صوت الجماهير
صوت الجماهير أعلنها بجد
الثورة دي مش ثورة حد
وآدي كتف ف كتف ويد ف يد
والصورة واضحة بدون تزوير
صوت الجماهير

صوت الجماهير مش بيساوم
بالثورة حارس بيقاوم
والله أكبر ع الظالم
ودا فوق كل كبير فيه كبير
صوت الجماهير
صوت الجماهير بيشق الليل
ويجيب القمرة لـ حضن النيل
ودي أول خطوة فـ أول ميل
ولسه ياما باقي كتير
صوت الجماهير

صوت الجماهير بيشق نداه
ويزلزل قلب وكرسي طغاة
والحق معانا بإذن الله
والنصر من عندك يا قدير

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :