الأقباط متحدون - نوفمبر 2009
  • ٠٠:١٨
  • الأحد , ١٢ ديسمبر ٢٠١٠
English version

نوفمبر 2009

مروة رخا

الدنيا خيارة

٠٠: ١٢ ص +02:00 CEST

الأحد ١٢ ديسمبر ٢٠١٠

بقلم: مروة رخا
كل كام شهر كدة بتجيلى حالة من "التعشيش" ... nesting يعنى. بتلاقينى كدة جرة ناعم و بـ أبث موجات حنية مكثفة والفساتين واللبس البناتى بيطلع ولطافة بقى وأنوثة ورقة ... أغلب الوقت بيتصادف مرور مواطن فى طريقى وأنا فى حالة التعشيش دى وزى الفراش وانجذابه للنار، المواطن بينجذب ليا. أنا وقتها بتبقى نيتى خالصة وقلبى صافى وفعلاً ببقى عايزة أتجوز. من غير الدخول فى تفاصيل قرقشة وقرمشة ومصمصة المواطن ... الأشلاء بتبقى للركب والمشرحة بتزيد قتيل.
فى أول 2009 ... بالتحديد فى ليلة راس السنة أعلنت إنى هاتجوز ... هو دا هدفى فى 2009 الـ new year resolution وكدة.

وكانت أطول حالة من التعشيش مريت بيها ... العادى إن الحالة دى مش بتزيد عن شهر كحد أقصى لكن المرة دى قعدت خمس شهور متواصلة. كانت حواليا هالة عظيمة من اللون البرتقالى ... هالة من الإبداع والإيجابية والحياة والسعادة الداخلية والسلام النفسى والإستقرار وتحقيق الذات ... وإنجذب مواطن ورا مواطن للهالة البرتقالى ... واتحرقوا!
أنا مش هدخل فى تفاصيل الأخطاء المكررة والغباوة المركبة ولا هاتكلم عن فترة غثيان ما قبل انتهاء العلاقة ولا فترة اكتئاب ما بعد انتهاء العلاقة ولا ردود فعل المواطن ولا ردود فعلى تجاه ردود فعل المواطن ... مش هو دا موضوعنا.

موضوعنا بقى هو مواعدة خبيرة العلاقة العاطفية ... ما هو دا تعريفى الإعلامى وشغلى الشاغل وأكبر خبراتى ومصدر موضوعاتى ومقالاتى.
لما بقابل المواطن وبأقول إن أنا كاتبة متخصصة فى العلاقات العاطفية وعندى برامج وناس بتبعت لى مشاكلها بيحصل رد فعل من اتنين ... يا ضحك مستمر وسخرية وتريقة ... يا حاجب مرفوع وإنصات باهتمام وكأنى دكتور زويل بيحكى تاريخ حياته.
وتبتدى العلاقة ... وتنتهى بسبب افتراضات مالهاش أى أساس من الصحة

أول افتراض: متوقع إنى عندى كل الإجابات لكل أسئلته عن كل علاقاته السابقة. بيقعد يحكى ويسأل وأنا باحس إنى طبيب نفسى مش واحدة فى ميعاد غرامى.
تانى افتراض: فاكرنى عرافة وبقرا المستخبى. بيسكت ويبص لى ويسألنى تفتكرى أنا بافكر فى إيه؟ أو تفتكرى أنا عايز إيه دلوقتى؟ أو تفتكرى احنا موضوعنا هيكمل؟
تالث افتراض: فاكرنى حاوى وعندى حلول سحرية لكل المشاكل. كل سؤال أسأله بيبقى الرد "هو مش انتى خبيرة العلاقات العاطفية؟"
رابع افتراض: فاكرنى قديسة مش إنسانة ممكن تفقد أعصابها. عادى إن مودى يقلب وبوزى يطلع وصوتى يعلا وأزهق وأتخنق وأتزرزر
خامس افتراض: فاكرنى مش زى بقية بنات حواء محتاجة اهتمام وكلام حلو وإنى أشوف فى عينيه الحب والإنجذاب فى كل لحظة
سادس افتراض: فاكرنى عبيطة وممكن يضحك عليا بكلمتين مش عارف إنى عندى حساسية مفرطة تجاه القرع والخيار والبكش والكليشيهات والكلمات الجوفاء المفرغة الخاوية المقرفة
سابع افتراض: فاكرنى عمياء ومش شايفة من الغربال ... مش شايفة إنه بيكدب أو إنه بيرسم أو إنه مش عايش عيشة أهله
تامن افتراض: فاكرنى ممكن أدخل جواه وأصلح ما أفسدته أمه وداس عليه أبوه ... كلنا جرحى وأسرى حرب .. خلاص بقى .. مش هنقعد نغنيها على الربابة ونستدر بيها عطف الناس
تاسع افتراض: فاكر إن كفاية معرفتى بدهاليز العلاقات علشان علاقتنا تنجح وهو بقى يريح ويأنتخ وكفاية عليا طلته البهيه
عاشر افتراض: فاكر إن أنا ماعنديش أشباح وأموات وفوبيات وصندوق أسود قابل للإنفجار فى أى لحظة ... أنا ما عنديش حدود ولا أسوار ولا أبواب مغلقة ولا أى حواجز من أى نوع ... أنا أرض واسعة ممتدة على مرمى البصر ... بس مفخخة!
ليه المواطن المنتظر بيتهمنى بالفشل فى علاقاتى؟

هو مش الدكاترة ممكن يعيوا واللعيبة ممكن ضرابتهم تخيب والقناصة ممكن عيارهم يطيش ... وأنا كمان علاقاتى ممكن تبوظ!

17- رأي

كوك

٢١ ديسمبر ٢٠١٢

١٩: ٤٢: ١٩

أنا اختصاصية نفسية تزوجت بدكتور متخصص في هذا المجال. .براي أن هذا افضل حل لكي.
16- رأى الكثيرين فيك

سامى منير

٩ يناير ٢٠١١

٥٠: ٠٥: ١٥

رأى الكثيرين فيك إنك زى نوعية كثيرة من البنات - أسف للبنات إللى بجد - مسترجلة بطبيعتها و دى ملهاش ذنب فيها ده تكوين نفسى و هرمونات ....إلخ . و الأمثله كتير نوال السعداوى - إيناس الدغيدى - سماح أنور .... بالزمة فيه واحدة محترمة تسمى الأسم ده النيا زى الخيارة ؟؟؟
15- حبيبتى

علا

٢٢ ديسمبر ٢٠١٠

٤٠: ٢٧: ١٩

يا جميل انا لو مكانك اول ما هحب حد او ارتبط بحد هتفق معاه اننا ننسى موضوع شغلى ده ونعيش الحياه زى محنا عوزين اتمتعى يا مروه بكل لحظه ..................يا رب يوفقك ويحميكى ويسعدك يا رب يا مروه تحبى وتتحبى من الانسان اللى تقدرى تكملى حياتك معاه .
14- ها ها ها

ماركو بهجت

١٥ ديسمبر ٢٠١٠

٠٩: ٥٠: ١٤

ممكن ؟؟؟؟ !!!! هى فين علاقاتك الى مابظتش طب الدكتور بيعي اوقات مش علطول عيان واللاعيب كوره ولا اتنين بتخيب مش كله حقيقى دمك زى العسل ويا ريت الدنيا كلها تبقى بسيطه زيك
13- عسل

SMSMA

١٥ ديسمبر ٢٠١٠

٣٢: ٤١: ٠٦

بجد انتى عسل قوى وخسارة فى اى مواطن واكيد واحدة متميزة وذكية ذيك لازم المواطنين تقلق منها لانها هتكون مسيطرة على الحياة بقوة شخصيتها من راى تدورى على مواطن ذات شخصية قوية جداااااااااااااااا علشان يقدر يحتويكى بجد وميرسى لمقالك الممتع
12- اول مره اقرا ليكي مقاله يا مروه

mona

١٢ ديسمبر ٢٠١٠

٢٦: ٥٣: ٢٢

بس بجد عجبتني جدا ...لقيتك ذكيه وجريئه وجذابه .. ..وصريحه اما عن اللي انجذبوا اليك...فاحترقوا كما يحترق الفراش لما ينجذب للنار وصفت حاله داخليه لاي امراءه طبيعيه عاوزه تعمل عش...وده عادي جدا وصريح لان يكتب فقد تجراءت هند صبري وقالت عاوزه اتجوز. لكن...ال 10 افتراضات اللي حكيتي عنها.....هي اللي جعلتهم يخافوا من شخصيتك ..كانوا كلهم بيدرسوكي ..ومعظم الشباب بيخافوا من صاحبه الشخصيه المدقدقه الواعيه اللي زيك.يعني انك حاتفهمي اللي قدامك...واللي قدامك مش عارف يدخل ليكي منين. لازم اللي يحبك يكون يكون مبسوط من شخصيتك دي ومعجب بيكي..ويكون بسيط في تفكيره وهادي، علشان يثق فيكي في المستقبل كشريكه للحياه. اما الاغلبيه من الشباب اللي امهاتهم ليهم شخصيه ضعيفه يهربوا من امثاللك من الشخصيات الجريئه.البارزه .التي تثبت ذاتها...وينسحبوا بصنعه لطافه. بس ان شاء الله فيه ناس كثيره حاتلقطك بسرعه...وهنبارك قريب في التعشيشه اللي جايه... التوقيع:ماما منى
11- باب النجار مخلع

Coptic

١٢ ديسمبر ٢٠١٠

٠٧: ٥٧: ١٦

\\\"هو مش الدكاترة ممكن يعيوا واللعيبة ممكن ضرابتهم تخيب والقناصة ممكن عيارهم يطيش ... وأنا كمان علاقاتى ممكن تبوظ!\\\" باب النجار مخلع
10- خبيرة علاقات عاطفية

ماجدة سليمان

١٢ ديسمبر ٢٠١٠

٠٢: ٣٦: ١٦

مرمورة اول مرة ارد عليكى بس من الواضح انك محتاجة وبشدة لخبير علاقات عاطفية مذكر ممكن يكون عندة الحل
9- معلش يا مروة

انجل

١٢ ديسمبر ٢٠١٠

٢٩: ١٣: ١٦

معلش يا مروة مواطنين ضايعين خالص مهو برضو الواحد بيبئى كدة غضبن عنه يعنى انا لو قدامى دكتور نفسى هفضل افكر ياترى هو بيحللنى دلوقت ياترى هو بيحسبنى عندى مرض نفسى ياترى هو بيراقب تصرافاتى ،، وهكذا بئى يعنى مش بتبئى مقصودة زى لو قدامى دكتور سنان هفضل طول الوقت قافله بُئى لا يقول حاجة ولا حاجة وكدة بئى
8- سكررررر

مواطنون فاشلون لا يستحقون الاستوطان

١٢ ديسمبر ٢٠١٠

٢١: ٠٨: ١٥

من متابعتي لقصة حياتك الحمدلله انك لاقيتي المواطن الي يصلح ان يستوطن ارضك يا مروة
7- موافق لشروط النشر

قبطاوى

١٢ ديسمبر ٢٠١٠

٣٢: ٣٣: ١٤

المرة دى يا مروة انا شايف كلامك (سكر) زيادة وقلمك بينقط (عسل) أبيض علشان كده اتنشر والناس تفاعلت معاه ... بس انتى نسيتى بعض افتراضات تانية زى مسترجلة مثلا او مش صريحة او لسانك مش بيقف على محطات او لسه بتتفرجى على افلام ابيض واسود .كفاية كده
6- إنجذب مواطن ورا مواطن للهالة البرتقالى ... واتحرقوا!

مجدي العريان

١٢ ديسمبر ٢٠١٠

٥٢: ٠٦: ١٤

إنجذب مواطن ورا مواطن للهالة البرتقالى ... واتحرقوا! الحل موجود يا أخت مروة، الحل سهل وبسيط. أتركي المواطن، الأمل مفقود في المواطن. جربي الأجنبي. لكن حقيقي يا أخت مروة نحن نريدك تكتبي مقالاتك بشكل يومي. نحن نريد أن نجد مقالات مروة رخا موجودة 7 أيام في الأسبوع 24 ساعة في اليوم. نريد أن نقرأ لمروة رخا كل يوم.
5- I like it

Ay Kalam

١٢ ديسمبر ٢٠١٠

٤٣: ١٨: ٠٦

. I like the way you described the nesting state, very accurate and funny in the same time. We all went through these peaceful periods when the face would be glowing and the spirit is high. I wish you happiness. And as you know (since you are the expert) you don’t have to be in a relationship (though it is nice to be in one) in order to be happy and be a fulfilled women. Soon the right \\\'mouwatn” will be attracted to you and you will find yourself very patient with him. Good luck, you are a talented and a smart young women.
4- حبيبة الملايين

مجدي العريان

١٢ ديسمبر ٢٠١٠

٠٦: ٠١: ٠٦

صباح الخير يا مروة يا حبيبة الملايين الحل هو بث المزيد من موجات الحنية المكثفة.
3- مفردات 2010

مندهش

١٢ ديسمبر ٢٠١٠

١٥: ٢٢: ٠٥

بس سؤال سريع جدآ...أنتى بتستخدمى المفردات و التعبيرات اللى فى المقالة (مودى يقلب وبوزى يطلع، القرع والخيار والبكش والكليشيهات، يأنتخ ) فى حياتك اليوميه... يعنى هو ده الفوكاب بتاعك ولا لما بتمسكى القلم و تكتبى الموضوع بيختلف؟؟؟
2- مبروك

اللي بالي بالك

١٢ ديسمبر ٢٠١٠

٠٢: ٥٥: ٠٠

مبروك انتهاء سلسلة الدنيا خيارة مع انك اثبتيلنا ان الدنيا مش خيارة دي اتاية
1- طيب

روز

١١ ديسمبر ٢٠١٠

٣٢: ٤٠: ٢٣