محرر الأقباط متحدون
شن الكاتب والمفكر مؤمن سلام، هجوم حاد علي الدكتورة شيرين غالب نقيب أطباء القاهرة، وأستاذ الطب الشرعي والسموم بكلية الطب جامعة القاهرة، بعد تصريحاتها على أهمية اهتمام المرأة بمنزلها في المقام الأول ثم من بعدها تأتي مهنتها، خلال حفل تخرج طالبات «طب أزهر أسيوط»، أمس الأربعاء.
وقال مؤمن سلام، عبر حسابه الرسمي علي موقع التواصل الاجتماعي فيس بوك: كلام شيرين غالب نقيب أطباء القاهرة وعضو المجلس القومي للمرأة للطبيبات الجديدة اللي قالت فيه:
"كلمة بس للطبيبات الجمال اللي متخرجين النهاردة، أنتٍ بيتك ثم بيتك، أولادك وبعدين مهنتك، أوعي حد يقول لك مهنتك قبل ولادك، أوعي، حضرتك لو قعدتي في بيتك في مليون طبيب بره هيعالج، لكن لو سبتي ولادك مالهمش غير أم واحدة هو أنتِ".
بيطرح سؤال مهم عن معايير اختيار عضوات المجلس القومي للمرأة، واضح ان الست مالهاش أى علاقة بحقوق المرأة، ولا تفهم حاجة في النضال النسوي، وما قرتش كلمتين في استراتيجيات تمكين المرأة؟
وأضاف: أن شيرين غالب مش فاهمة أن الكلام ده معناة أن البنات ما تتعلمش غير يدوب لحد الإعدادية عشان تقرا وتحسب وبس، ما طالما كده كده حتقعد تربي العيال في البيت ايه لازمة ثانوية عامة وحرقة دم المجموع، وكمان تدخل كلية طب 7 سنين، ايه الفايدة من كل ده؟
وبعدين هى مش فاهمة ان الكلام ده بيروح في اتجاه ان هدف الست الأسمى هو الزواج، وان النجاح والانجاز وتكوين الثروة والشهرة ده شغل الرجل فقط؟
وكمان مش فاهمة انها كده بتكرس لجملة "الست مالهاش غير بتها"؟
وتسأل: انتوا بتجيبوا الناس دي منين؟
