"حبيب" يدعم "منى زكي" بذكر افلام مهمة مأخوذة من الواقع عن الخيانة - نفاق المتدين- استغلال الخادمة جنسيا - وأد البنات

يواصل السيناريست تامر حبيب، دعم فيلم (أصحاب ولا أعز)، وبطلته منى زكي، والذي عرض عبر منصة "نتفيلكس"، وشن عليه المتشددون هجوما شديدا.

 

حيث ذكر حبيب في تدوينة عبر حسابه على فيسبوك، افلام مصرية قديمة مهمة تناولت مشاكل موجودة داخل المجتمع ، من بينها خيانة الزوجة ونفاق المتدين واستغلال فقر الشغالة والمثلية الجنسية، ولم تهاجم بهذا الشكل القاس كما حدث مع فيلم اصحاب وعلى اعز، وجاء بنص التدوينة : 

 

انا اخترعت لعبة سميتها : ( ملوخية ) واللي حابب يشارك اهلاً بيه، كل واحد يكتب الافلام اللي  مابتتكلمش عن مجتمعنا :  

 

١/ بين القصرين/ قصر الشوق/ السكرية  : راجل محترم و ليه هيبته و عنده جانب تاني برة البيت مع العوالم و الغوازي و بيسكر و مش بعيد يكون شرب واين مع الكوارع كمان و عمل علاقة مع عالمة و خداها عوامة و بعدين ابنه اتجوزها، ابنه ده اللي كان عايز ينام مع الشغالة و اتجوز البنت اللي اخوه الشهيد كان بيحبها، و اللي كان واحد من ولاده مثلي و بنته مُلعب بتراوض ابن عمتها السني عن نفسه و هو قال كمان استسلم  و كل ده في احياء مصر القديمة بعبقها و جوامعها و اصالتها….  دول بيعبروا عن مين ؟ .

 

طبيب محترم له سمعته و ناجح في مهنته، و مش راضي يتجوز و بيعرف ستات علي بعض و يعمل معاهم علاقات كامله خارج المؤسسه و بيخرب بيت واحده حبته و خانت جوزها معاه، ويسيبها و تنخطب لواحد يعرف انها كانت علي علاقة بالطبيب فبيعاملها علي انها ساقطة و بعد ما ياخد غرضه منها بيجيبلها صحابه يمارسوا معاها حاجات وحشة و بتتحول بالتدريج لعاهرة بفلوس… مجتمعنا فيه عاهرات بفلوس، حد يصدق خرافات زي دي ؟ .

 

بنت علي قد حالها ربنا استجاب لدعوة انها و اتسترت و اتجوزت باشا ملو هدومه و ربنا رزقها بالعوض و جابت ولد جميل اسمه هاني، قوم بدل ما تحمد و تتشكر ، احب واد طيار زي القمر و يحبها و تتبطر و تطلب الطلاق من الباشا الكُمّل، و لما يرفض مش ترتجع، لأ الفاجرة فضلت مع الطيار بتاعها قال ايه عشان بتحبه، نسوان عايشة حش كرشها.

 

راجل هيبة و له قيمة بينام اللهم احفظنا مع الشغالة اللي عنده مستغل حوجتها و جريها علي جوزها العيان و ابنها الحيلة.

 

راجل بيقلب ست و يحب صاحبه و يتجوزه في الآخر.

 

مجموعة من الناس المفروض امهم ليهم اسمهم و وزنهم في المجتمع بيتلموا في عوامة و يشربوا حشيش، اه والله حشيش في مجتمعنا، معقولة ؟؟؟؟!!!! لا و كمان بيجيبوا ستات متجوزة و بنات و يعملوا معاهم حاجات.

٦/ السراب:

شاب معقد، ايوة معقد في مجتمعنا !!!! امه عملتله عقدة جنسية علشان - مش قادر اقولها- قال ايه فقشته مع الشغالة، قال في مجتمعنا المراهقين بيعملوا حاجات مع الشغالات !!!!.

اخ و اخت صعايدة، يعني النخوة و الحمشنة بيؤدوا بنات الاخت يشتغلوا في البيوت، و راجل مهندس ري برنس، قال ايه بيهتك عرض البنات دي.

 

ست بتقلب راجل و تعيش مع زوجها السابق كأب تاني لابنهم، و تتجوز صاحبتها برضه.

 

و الانكت بقي ان الفيلم ده مأخوذ من قصة واقعية عن راجل بيكتشف بعد ما ابنه بقي عنده ١٠ سنين، ان الواد مش ابنه لان الراجل طلع عقيم، و ان الواد ابن صاحبه الانتيم اللي ضعف هو و مرات الراجل صاحبه و ناموا مع بعض مرة واحدة كانت نتيجتها الواد ده….. اننا القصة الحقيقية اللي حصلت بجد في احد الاحياء الشعبية، ان مراته حملت و خلفت من اخوه، و مش عيل واحد، دول ٣ عيال.

 

راجل دني و عينه فارغة مش عارف يستكفي بست واحدة، و قال رايح كمان يحب واحدة مش من دينه، و اللي زاد الطيبة بلة ان البت كمان بتحبه، ده غير مرات انتيمه اللي بتحبه من زمان و اللي جوزها لما عرف طلقها بس قال حاول يفضل صاحبه، ده غير المفضوحة التانية اللي متجوزة راجل عجلة و هي عارفة من قبل ما تتجوزه قال و كمان مخلفة منه…. احيه احيه احيه.

 

و طبعاً لسة افلام كتير قوي، ياللا اللي عايز يلعب يتفضل ينضم، و انا كل شوية هادخل اذكر كام فيلم مابيعبروش عن مجتمعنا. #لعبة_ملوخية.