كتب – محرر الاقباط متحدون ر.ص
تداول رواد مواقع التواصل الاجتماعي، منشور كشف تفاصيل القصة الكاملة لاستخراج جثة الطفل القبطي بالفرافرة بعد 4 أيام من دفنه.
وقال المنشور المنقول عن احمد الخنيني :"
الناس اللى بتشكك في فيديو الطفل المصري القبطي المستخرج جثمانه من إحدى قرى الوادي الجديد دى نص رسالة من أبو الولد بعتهالى ومرفقة بالمستندات، صباح الخير للجميع هحكى قصة حصلت معايا ياريت تكملو الكلام للآخر
أولا أنا مقيم بقرية الكفاح مركز الفرافرة محافظة الوادي الجديد، هناك الأقباط مالهمش مدافن غير في قريه اسمها النهضة ودى مخصصة لكل الأقباط إلى موجدين ف المركز عموما ودى تبعد عن قريتنا مسافة 100 كيلو متر وغير مصرح فيها ببناء مدافن جديده من قبل الحكومة بحجة أن الأقباط بيدورو على اثار الكلام ده بقالو سنتين ممنوع بناء مدافن لهذه الحجة إلى مالهاش لازمة هنروح ندور ع اثار ف الترب.
ثانيا في قرية الكفاح قدمنا طلب بتخصيص قطعة أرض تبلغ مساحتها 30 الف متر فى منطقة صحراوية على طرف القريه وجمبها مدافن الإخوة المسلمين واخدنا موافقة من هيئة الآثار وتم استلامها من مجلس المدينة بمركز الفرافره وتم تسليم الأرض عن طريق المجلس المحلى ودق الحدود من اربع اتجاهات والمفروض يكون فى موافقة نهائيه لاعتماد القطعة دى مدافن للأقباط الكلام ده من 2017 والى حصل انو في يوم 26/7/2020 كان يوم احد انتقل ابني سامر مارك ماهر عن عمر 11 عام طفل دلوقتي مفيش مدافن لينا ف قرية النهضة بسب منع الحكومة بناء مقابر.
تم دفن ابنى فى قرية الكفاح فى القطعة إلى مقدمين عليها بجوار مدافن المسلمين القيامة قامت عليا أنا وقتها كنت ف مصر بسبب حكم شغلى محضرتش دفن ابنى وصلت 3 الفجر صباح الاتنين يوم الاتنين الموافق 27/7202 الساعه 10 الصبح روحت الوحده الصحيه بالكفاح استخرج شهادة وفاه الطفل الموظف رفض دى اول نقطة قال انتو مالكمش مدافن هنا مش هديكم شهاده وفاه رجعت البيت الساعة 2 الضهر من نفس اليوم خدونى ع قسم الفرافره بتهمة التعدى على أملاك الدولة ودفن بدون تصريح وكام تهمة محترمة من اداره مجلس المدينة بالفرافرة.
روحت القسم وبيت وقالو انى هتعرض على نيابه الداخلة صباح يوم التلات ملحقتش حتى اخد عزا ابنى فعلا اترحلت واتكلبشت اول ما وصلت نيابه ومحكمة الداخلة لاقيت الحكم صادر من قبل ما اشوف اى حد وكان معايا محامى حكمت النيابه باستخراج الجثة وغرامة 20 جنيه المحامى استأنف عملو جلسه محاكمة تانى يوم مباشره يوم الاربع اسرع محكمة ف التاريخ واخلو سبيلى انا طبعا رجعت ع مركز الفرافره مع العلم المسافة بين الفرافره والداخلة 4 ساعات سفر رجعت الفرافره ع الساعة 8 باليل يوم التلات خرجت الساعة 12 من القسم سافرت الداخلة وصلت الصبح دخلت المحكمة عشان القضيه المحامى بيتكلم مع القاضى القاضى قالو دى 20 جنيه ادفعها وخلاص قالو المشكلة ف الجثة دى لسه مدفون من تلت ايام.
المحامى بيترافع ولسه بيقول الأقباط يدفنو فين القاضي المحترم اتعصب وقالو الكلام ده ميتقالش ورمى الورق ورفع الجلسة وأكد على الحكم أن الجثة تخرج والقبر يتشال عملنا استئناف واخدنا معاد جلسه تانيه كان يوم 13/9/2020 أنا قولت خلاص أروح اتعمل كمين ليا ف نص الطريق ف مكان اسمو غرب موهوب وانقبض عليا كانى إرهابى وبسال فى ايه للسادة الظباط بيقولو منعرفش احنا اتبلغنا أننا نقبض عليك ركبت البوكس ورجعت ع المحكمة تانى ولاقيت هناك كم وفير من الرتب وجابوها من الاخر هتطلع الجثة يعنى هتطلع الجثة تخيل جثة ابنك يرغموك تخرجها بعد تلت ايام دفن ومتعرفش انت هتدفن فين اصلا.
اى دين واى شرع يحكم بكدا لا حضرت دفن ولاعزا ابنى وكمان حرمت الميت تتهان والبلد كلها تبقا عليك أمن دولة وأمن وطنى ومجلس مدينة ووحده صحيه وخلونى أتنازل عن الاستئناف ولغوه وقعت بخط ايدى لولا ما الجثة اتشالت لولا ما سابونى الكنيسه شالت ميت ف تربة بقالو مدة مدفون وابنى اندفن مكانو عشان مفيش مدافن والحجة بتاعتم ممنوع مدافن للأقباط جمب المسلمين عشان ميحصلش احتكاك بينهم عايشين مع بعض هنحتك واحنا ميتين حرام عليكم دلوقتي إلى يموت يروح فين ندفن ف الشوارع ولا نولع ف الميت وخلاص كفايه ظلم وكفايه عنصريه أنا عارف انى يمكن اروح المعتقل بسب كلامى ده لكن لازم حل للأقباط فى الفرافره مالناش مدافن وارض الله واسعه لو اى حد لاجئ الدولة بتدفنو لو حصل حاجة زى كدا واحنا ولاد البلد وعايشين فيها وقضينا خدمة عسكريه ونعيش ونموت منلاقيش مدفن ياريت الكلام ده يوصل للكل والناس تعرف وبطلب من سيادة الرئيس لو وصلك كلامي تنجدنا.
