ماجدة سيدهم
البعض يسأل هو ليه الستات بالذات اللي بتنزل أي  انتخابات لازم  يرقصوا  ادام اللجان .. وإيه علاقة الانتخابات بالرقص ..

أقولكم  ..العلاقة لصيقة و قوية جدا ..

طبعا أغلبنا  كستات في هذا المجتمع المعتم  لا  فاهمين حاجة  ولا عارفين  أي حد من  المرشحين ولا فارق معانا حايعملوا إيه   ولا حتى   عاوزين نعرف ..لأن خلاص بح ..الحكاية  أن شوية ناس ببدل لميعة حايجيوا يسرقونا  ويقولوا شوية تصاريح فضيحة  زي اللي قبلهم  واللي قبلهم

لكن برضه  اغلب اللي بينزل مننا  مش وعي  منهم  ولا علشان لسه بنحلم بالمستقبل اللازوردي  ولا لأن  صوتك أمانة ولازم نفوت الفرصة على الدقون (دا على اعتبار أن الدقون مش مرحرحة في الأدمغة من يوم ماقولنا يا ثورة ويا انتخابات .. )

احنا بننزل ونرقص للتنفيس ....وعيني عينك ...بحجابنا بنرقص بخمارنا ونقابنا  وعباياتنا  بنرقص  ..وتلاحظ كل اللي بيرقص ستات كبارات ..يعني مش بنات صغيرة ..

ف اللي يقولك أن الستات مبسوطين ومقتنعين و ومش مضغوطين  قوله أنت كداب  وجاهل  وضلالي ..هم بس اتعودوا على التهميش  والقهر  ..

الستات لما لقوا فرصة الحماية من الدولة خرجوا ورقصوا  أدام اللجان الانتخابية ومنهم اللي خلعواالطرحة (طبعا  كتعبير عن فرحتهم  بالانتماء للوطن ..) ..حد يقدر يفتح بؤه فيهم   وهم واثقين أنهم  في حماية القانون والدولة..
 
طب اعطوا الستات كدا  الضمان لمدة نص ساعة بس  ليعبروا عن نفسهم  ومخاوفهم وكبتهم  وياخدوا  بنفسهم  قرار واحد في حياتهم بحرية   من غير أي   ولاية  أو محاسبة أو تخويف  باللعنات و والتهديد  بالعذابات والشوي في نار جهنم و الطلاق وفلان قال وابن علان أفتى  ..

مدة نص ساعة بس  مش أكتر. .

الخوف ياسادة  والعمر اللي راح  وراء علماء  الجهل والقمع والخرافات ثمنه غالي ..لكنه الحل

أما  الستات الشرسات والحريصات   في   الابقاء على فروض القمع  عليهن  باعتباره  فرض ديني  دول  للأسف الأكثر بؤسا وشقاء وعنف وتشويش

عرفتوا ليه بننزل نرقص ادام اللجان الانتخابية  وصورنا على السوشيال ميدبا ولا بيهمنا ..حتى لو أجبرونا وأغرونا بجنيهات  أو بكرتونة  شهية ..برضه تنفيس مش أكتر ...وهنا تبقى كارثة أجل في استغلال النساء للترويج الانتخابي ..وكله فدا الوطن