كتب - محرر الاقباط متحدون
قال الإعلامي محمد علي خير:"عندما بدأ الدولار في الصعود وتجاوز حاجز الـ56 جنيها، قرر التجار رفع الأسعار.
مضيفا خلال تقديم برنامج "الملخص مع خير":" بالتالي زادت أسعار الأجهزة الكهربائية بنسبة 8%، وأعلن بعض المطورين العقاريين أنهم سيرفعون الأسعار بنسبة 15%، كما ارتفعت أسعار السجائر.
لافتا:"بعدما انخفض الدولار بنحو 5%، هل سيُخفض التجار الأسعار التي رفعوها؟ أليس الأمر قائما على "عليا وعليك"؟، هل ستعيد التسعير كل يوم؟ السؤال: ماذا يحدث في مثل هذه الحالة؟، الإجابة: يحدث أمران.
موضحا:" الحاجة الأولى حاجة محترمة: يقعد رئيس مجلس إدارة الشركة أو المصنع اللي بيصنع سلع وعايز يسعرها يقول: يا إخوانا، خلوا أسعارنا ثابتة لمدة 45 يوم إلى حين أن يستقر سعر صرف الدولار مقابل الجنيه، يمكن ينزل، يمكن يطلع أكتر، وساعتها هناخد قرار بالزيادة.
لافتا:"دي الحاجة المحترمة، دي قواعد السوق اللي نعرفها، ده التاجر المحترم والمصنع المحترم، وهو قاعد مع مستهلك غلبان بيمد إيده في جيبه.
كما أوضح:"الحاجة التانية اللي مش محترمة؟ إن التاجر أو المصنع يقول لك: هو الدولار مش 56؟ كده يبقى هيلمس على الـ60، يا باشا، مين قال لك؟ ما هو ممكن يلمس على الـ50، يبقى إحنا نسعر على الـ60، يلا يا شباب في الحسابات، سعر لي الدولار على الـ60، ونزل لي الأسعار بالشكل ده، نزل لي، مش تخفض الأسعار، اطبع التيكت على كده.
وواصل:"طب الدولار نزل يا عم الحاج، مش من حقي كمستهلك تخفض لي؟ مش جهاز الكهربا اللي أنت رفعته 2000، 3000 جنيه؟ طب بحق ربنا ينزل 1000 ونص؟ ما الدولار نزل.
وتابع:"يقول لك: لأ، الحاجة اللي سعرها بيزيد في بلدنا ما بتنزلش تاني، طب ينفع الكلام ده؟ ما ينفعش الكلام ده، ده مش سوق، بالمناسبة، دي ناس قاعدة عمالة تحط إيديها في جيب المستهلك، في جيب المواطن.
