ماجدة سيدهم
من وقت بحاول أبعد عن الأخبار المفزعة.. لكن وقفت عند فيديو لجريمة متكررة ومنتشر لمعلمة فاضلة ..صانعة أجيال..تصوروا . ايوه  اللي في الصورة الصفرا دي ..

ماتنزعجوش ..للأسف البت صانعة الأجيال دي زيها مئات الالوف ..زوجات فاشلة..وأمهات فاشلة وعاملات فاشلة .. كتلة غل وفشل متحركة لأذية الخلق ..
العينة دي لما بيقع تحت إيديها أي طفل حتى لو ابنها يبقى اتكتب عليه القهر بدري..

العينة المجرمة دي كتير تلاقيهم كتير في دور الأيتام والحضانات ودورعاية كبار السن وذوي الإحتياجات الخاصة والوحدات الصحية وكمان في الوظائف المدارس لحكومية ..وفيديوهاتهم وثيقة عار 
ياويل اللي يقع تحت إيدهم . 

 كل العقد  النفسية  بيطلعوها على الفئات الضعيفة دي 
 المحترمة من دول كدابة ومتدينة بالفطرة ..تلاقي عندها ثبات ولذة بالتعدي على أي حد ضعيف لاحول ولاقوة..

والتعدي مش ضرب بس ..دا قرص وسرقة فلوس على ملابس على  ساندوتشات ..دا غير التعدي اللفظي الخادش والتحرش الجنسي ..أيوه ستات كتير من النوعية التعيسة دي بتتحرش بالصغار وبكبار السن عادي جدا وياما شوفنا مقاطع  مابتكذبش 

. السؤال ليه اغلبهم ستات ..هاسيب لكم الاجابة من وجهة نظركم  وبلاش حتة التعليم لأن منهم تعليم جامعي 
لكن من وجه نظري.. القهر اللي خللى الست تحت الميكروسكوب ليل نهار  لازم ينتج عنه كبت جنسي مخيف ..مع التوحش الطبقي  بيوصلنا  لمجتمع بتكون فيه الجريمة عادية..كل يوم مصيبة شكل 

هو مش فيه أمهات بتقتل أطفالها علشان طرف تالت ..

 فعادي مدرسة تذل وتضرب طفل بالوضاعة والتشفي دا ..

دي تفرق ايه عن أي إرهابي 
الجريمة الإنسانية عنوان الشعوب المحطمة أخلاقيا والملوثة بالشعارات المتدينة والمتدنية في نفس الوقت ..

الله يرحم المستقبل على إيد شوية فسدة ..