د. بولا وجيه يكتب: "القوة اللي مبتخلصش"
«بِاللهِ نَصْنَعُ بِبَأْسٍ» (مز 60: 12).
في أوقات بنحس إننا وصلنا لآخر طاقتنا، وإن الحمل أكبر من قدرتنا، فنبدأ نفتكر إننا لازم نعتمد على نفسنا أكتر. لكن الحقيقة إن الإنسان مهما كان قوي، هييجي عليه وقت يضعف، لأن قوته ليها حدود.
الخبر الحلو إن ربنا عمره ما طلب مننا نعتمد على قوتنا. هو عايزنا نعتمد عليه هو. ولما الإنسان يسند حياته على ربنا، يكتشف إنه قادر يعمل حاجات ماكانش متخيل إنه يقدر عليها، مش لأنه بقى أقوى، لكن لأن ربنا هو اللي بيديه القوة.
كتير من المعارك اللي كسبناها، ماكسبنهاش بذكائنا ولا بإمكانياتنا، لكن لأن ربنا كان واقف معانا، يفتح أبواب، ويثبت خطوات، ويدينا نعمة في الوقت اللي كنا فيه ضعاف.
لو النهارده حاسس إنك مش قادر تكمل، ماتبصش لقدراتك بس. ارفع عينك لربنا، لأنه هو مصدر القوة اللي مبتخلصش. يمكن قوتك تضعف، لكن قوته عمرها ما تضعف، ووجوده معاك يغير شكل أي معركة.
مش بقوتك… لكن بقوة اللي ماشي معاك.
