ديڤيد ويصا
--
مفيش شك بتكون صدمة كبيرة لما شاب أو شابة بيموتوا ..
سواء في سن صغير أو لسّه متخرّجين أو متجوّزين ..
ومع إني مقدرش انكِر تعزية الله ..
لبعض الآباء والأمّهات اللي بيفقدوا ولادهم وبناتهم ..
إلا إن أحيانًا بيحصَل تركيز شديد من بعض كنايسنا ..
على إظهار صورة مُعيّنة لأب أو أم فقدوا ولادهم ..
باعتبارها نموذج للإيمان والرّجاء المسيحي ..
اللي المفروض كلّنا نعتبره قدوة ..
ومع إن التركيز ده بيكون بحُسن نيَّة ..
إلا إنه في وجهة نظري أحيانًا بيتحوّل لخطر شديد!
--
لو انت شاب أو شابّة والموت خطف منكوا صديق ..
لو انت ولد أو بنت والموت خطف منكوا أخ أو أخت ..
لو انت أب أو أم والموت خطف منكوا ابن أو بنت ..
من فضلك احترم حزنَك ووجَعَك، ومتخبّيهوش ..
لأن إخفاء الحُزن أو كَبتُه، مش دليل على مسيحيّتك!
عاوز تعيّط، تصوَّت، تصرُخ، تترمي في حُضن حَدّ؟
عاوز تتكلّم مع حد تشتكي وجعَك؟
أو تسأل وتستفسَر عن حيرة جُوّاك؟
اعمل كده، وملَكش دعوة بغيرك اللي فرحان أو بيرنّم ..
أو بيقول انه مش حزين لموت اللي مات!
--
موجوع ومصدوم من الله وعاوز تعاتبه؟
صلّي بحُرقَة وعبّر عن ألمك بصوت عالي لو تحب ..
اكتب اللي عندك في ورقة لو مش قادر تتكلّم، والله هيقراه!
وملكش دعوة باللي يقولّك ان الله صالح وحكيم ..
لو انت مش قادر تختبر ده في حُزنَك!
--
تعزية الله ..
مش معناها انه هيكبِت حُزنَك ويخنق دموعك ..
لكن معناها انه هيسنِدك لأنه مُتفهّم وجعَك ومقدّر كسرِتَك!
مش معناها انه هيأمرك تفرح وتتنطّط وتنكر محدوديّتك ..
لكن معناها انه هيمشي معاك سكّة فيها يحوّل حزنك لرجاء!
مش معناها انه هيحرمَك من التعبير عن خذلانك وحيرتك ..
لكن معناها انه هيفتحلك مساحة في حضنه تكفي حيرتك!
أحكم الحكماء، وأعظم العظماء، وأقدر المقتدرين ..
وقف قُدّام مشهد الموت وبكى عند لعازر (يو٣٥:١١)!
وأعظم الشّهداء كانوا بيبكوا من الوجع والألم ..
والله ممنَعش عنهم دموعهم ولا تعبيرهم عن ألمهم ..
لكن الرجاء كان أن:
"يمسح الله كل دمعة من عيونهم" (رؤ١٧:٧؛ ٤:٢١)
--
الخلاصة:
سيب اللي يفرح ويرنّم، يفرح ويرنّم ..
سيب اللي متعزّي ومختبر صلاح الله، يقول ده ..
لكن متفترِضش ان غير كده قلّة إيمان أو قلّة مسيحيّة ..
الله بيعرف يعزّي بسرعة بعض الناس ..
وبيعرف يقدّر وجع ناس تانية، ويعزّيهم ببطء ..
لكن المهم متبقاش عايش في حالة إنكار لوجَعك ..
عشان الإنكار هيتحوّل مع الوقت لانهيار من كُتر الكَبت!
ديڤيد ويصا
