قال الكاتب محمد أبو قمر :"مشروع حزب الله زي ما صرح حسن نصرالله بنفسه علنا في خطاب له موجود علي النت هو جعل لبنان جزء من الجمهورية الإسلامية في إيران ، وكانت إيران بتسلح حزب الله وتموله بسخاء علشان يحقق المشروع ده ، أما موضوع المقاومه وجبهة الصمود ووحدة الساحات فكان مجرد واجهة للتغطية علي المشروع الاستعماري الكبير لإيران .
مضيفا عبر حسابه على فيسبوك :"إيران مكنتش في أي يوم مشغوله بشكل حقيقي بالقضية الفلسطينية ، ولما تسأل نفسك إيه إللي عملته جبهة الصمود لفلسطين هاتلاقي النتيجة صفر .
لافتا:"الحاجه التانيه هي إن أثناء حرب إيران مع العراق كانت إيران بتشتري السلاح من اسرائيل نفسها ، ودا مش كلامي ، إنما الدنيا كلها عارفه الكلام ده .
الحاجه التالته هي إن لما كانت اسرائيل بتضرب غزه وتشرد أهلها وتجوعهم وتقتل النساء والأطفال إيه إللي عملته إيران لمساعدة غزه؟ ، دا حتي مخدتش واحد من مصابي غزه علشان تعالجه ، مبعتتش طن دقيق ولا علبة دوا لإغاثة الغزاويين.
الحاجه الرابعه هي لما كانت سوريا أيام الأسد بتنضرب كل يوم من اسرائيل إيه إللي عملته إيران دفاعا عن سوريا وهي عضو أساسي في جبهة الصمود وساحه من ضمن وحدة الساحات.
مشاريع أمريكا وإيران واسرائيل في المنطقه مشاريع متشابهه ومتنافسه ، كلها مشاريع توسعية استعمارية :
- مشروع اسرائيل في المنطقه طبعا معلن ومعروف لكن بتسميه باسم الحفاظ علي أمن اسرائيل وبتحاول تنفذه بطرق متعددة ...حرب...معاهدات سلام....مشاريع الديانات الابراهيمية.
- مشروع أمريكا هو الهيمنة علي الشرق الأوسط كله واستنزاف ثرواته وبتسمي مشروعها ده حماية المصالح الأمريكية ، وأحيانا تسميه حماية الدول الصديقه .
- مشروع إيران ميختلفش خالص لا عن المشروع الأمريكي ولا عن المشروع الاسرائيلي ، سيبك من موضوع المقاومه وجبهة الصمود ووحدة الاشتغالات والأونطة ، دي كلها أسماء وهمية ، فعلا أسماء وهمية ، فلو كانت جبهة الصمود حقيقية كانت إيران شكلت فيها جيش موحد من كل دول الجبهة .
كلمة جبهه دي يعني جيش مُجهز ومستعد وواقف علي خط النار في مواجهة العدو ، إنما جبهه كده مجانا من غير حتي عسكري واحد ع الجبهه دا شُغل اشتغالات ، إنما الحقيقه كانت إيران عينها علي البحر المتوسط وعلشان كده استهدفت سوريا ولبنان بالهيمنة والسيطره ، وكانت عينها علي البحر الاحمر وباب المندب وعلشان كده كانت اليمن هدف علشان تقسمها ، وكانت عينها علي بحر عُمان وعلشان كده دجنت سلطنة عمان .
المقاومه مش معناها إنشاء ميليشيات تفتت بلدانها وترعب شعوبها وتفشل دولها زي ما حصل في العراق ولبنان واليمن ، وكانت بتحاول تعمل الحركة الخايبه دي في مصر يوم الزياره السرية إللي عملها قاسم سليماني لمصر أيام الاخوان.
واختتم :"الخلاصه هي إن الحرب بين أمريكا واسرائيل وإيران هي حرب بين مشاريع متشابهه ومتنافسه بينهم لمد النفوذ في المنطقه ، لا شأن لفلسطين بها ، والكلام علي إن دي حرب ضد الإسلام دا كلام رخيص ومشبوه ودعائي والعفن مالي صدور أصحابه، وإللي شايف إن ميليشيات إيران ( حزب الله ، عصائب أهل الحق ، فيلق الوعد الصادق ، لواء عمار بن ياسر ، لواء ذو الفقار ، سرايا الزهراء ، حماس ، لواء أبو الفضل العباس ، أنصار الله الحوثيين ، لواء كفيل زينب ، لواء اليوم الموعود ، لواء أسد الله الغالب ، كتائب سيد الشهداء ، سرايا عاشوراء ، وغير كده كتير من الميليشيات ) إللي شايف إن ملاعيب شيحه دي مقاومه هو حر ، أو إن الميليشيات إللي أنشأتها إيران دي كلها من أجل تحرير فلسطين برضه هو حر ،كل واحد ينام ع الجنب إللي يريحه ، دي ميلشيات أنشأتها إيران في كل دوله حطت عينها عليها لإضعافها وإفشالها وتسهيل السيطره عليها.
