كتب - محرر الاقباط متحدون
قال الكاتب محمد أبو قمر :"إيران كانت بتتكلم كتير عن تحرير فلسطين ، وياما اتكلم قادتها عن القدس ، لكن حد فاكر إيران عملت إيه علشان فلسطين؟ ، في حد عنده دليل واحد يقول إن إيران كانت فعلا ناوية تحرر فلسطين؟ ، إيران صحيح عملت حاجه إسمها الممانعه ، لكن حد فاكر الممانعه دي منعت إيه؟ ، ومنعته إزاي مثلا؟.
مضيفا عبر حسابه على فيسبوك :"طيب حد عنده فكره عن جبهة الصمود والتصدي كانت فين حته؟ ، أو حد فاكر إن الجبهة دي كان لها جيش موحد مثلا وله قائد أو إن الجيش ده كان له قواعد مجهزة ومتمركزة في مواجهة العدو مثلا؟، طيب حد فاكر قاسم سليماني الله يرحمه جه مصر سرا ليه في السنه السودا أيام الإخوان؟.
وواصل :"بلاش كده وبلاش كده ، حد عنده فكره ليه الغرب سلم إيران للملالي علي حساب الشاه صديقهم وخادمهم المطيع؟، ياعم بلاش ده كله ، حد يعرف إيه هو مشروع إيران في المنطقه؟بس إوعي تقولي إن مشروع الملالي هو إحياء ذكري الحسين أو تهيئة المنطقة لاستقبال المهدي المنتظر عند عودته أحسن كده أزعل منك، ومش عايزك تنسي خالص إن إيران ساعدت حماس لغاية ما غزة جات ع الأرض.
واختتم :"شايفك هاتزعل ، واحتمال كتير هاتشتم ، إللي يزعل يشرب من مضيق هرمز .
