قال صانع المحتوى ماركو جرجس :"تخيل كمشجع أهلاوي لو ترجع معايا فلاش باك لسنة ورا وقلت لك إني هجيب لك الصفقات دي: (تريزيجيه، بن شرقي، محمد علي بن رمضان، إمام عاشور، مروان عطية، الشناوي وشوبير)، والمفاجأة الكبيرة ضيف عليهم أحمد السيد زيزو، وطبعاً بتقول في سرك ده فريق هياكل الأخضر واليابس.. أنا بقى جايلك من المستقبل وبقولك إن الفريق ده:كأس العالم للأندية:
مكسبش ولا ماتش في مجموعة متوسطة.
كأس مصر: خرج من دور الـ 32.
أفريقيا: خرج من دور الـ 8.
الدوري: البطولة الوحيدة الباقية واقترب من عدم تحقيقها.
مضيفا عبر حسابه على فيسبوك :" طب إيه السبب ؟
السبب الأول: غياب المدير الفني القوي، رغم الإسكواد القوي ده، مفيش مدير فني تقيل. وهنا بتفشل نظرية إن سبب نجاح مانويل جوزيه إن كان معاه فريق قوي، وإن أي مدير فني معاه لعيبة جامدين هياخد كل البطولات.. الكلام ده طلع مش حقيقي، لو أنت مدير فني مش تقيل ومعاك نجوم مش هتعرف تعمل حاجة.
السبب الثاني: عدم وجود مهاجم جيد .. تخيل فريق بحجم الأهلي ميزانيته بالمليارات ومش قادر يجيب مهاجم واتنين كويسين عليهم العين ويحافظ عليهم!.
السبب الثالث: صفقات "الأسلحة الفاسدة" و "فخ السكاوتينج"، تخيل تصرف عشرات الملايين في لعيبة مش بتعرف ترفع عرضية عليها القيمة، ولا يبنيلك هجمة صح، ولا بيعرف يشوط من بعيد.. أومال بتصرف الفلوس دي كلها على إيه؟! ده اللي بنسميه "فخ السكاوتينج"؛ إنك تلبس في صفقات لمجرد إن اسمها لامع أو "كيد نسا" في المنافس، لكن فنياً هي صفقات "كسر" مش بتفيد الفريق في الملعب.
الاحتياج أهم من "رص" النجوم، إنك تجيب صفقات محتاجها أهم بكثير من إنك تجيب نجوم تقيلة وترصهم جنب بعض. فيه أسماء لامعة مكانش الأهلي محتاجها، في حين إنه محتاج صفقات في مراكز تانية زي الدفاع والباكات ورأس الحربة.
الأزمة الإدارية والمالية : الأهلي في ورطة لأن "توروب" لو مشي، هيبقى ده تالت مدرب الأهلي بيدفع له مرتبه وهو في البيت بسبب الشرط الجزائي، ونفس الحال بالنسبة للصفقات الكتير اللي أثبتت فشلها.
واختتم:" الحل: الخصخصة هي الأمان, أنا مع خصخصة كل الأندية زي الأهلي والزمالك، هتلاقي مالك النادي حريص على الجنيه، ومش بيرمي عشرات الملايين في الأرض بسبب سوء إدارة وصفقات غير مدروسة.
