اسامه شوقي
برضه بهدوء و بدون انفعال و بدون تعصب و ارتجال..

متفقين اننا شعب متعدد الديانات و متعدد التقاليد و العادات و العبادات..

الصوم عند الاخوه الاقباط فيه التزام بعدم تناول اللحوم، فهل معني هذا ان يقف مواطن قبطي وسط مطعم ابو شقره يتهجم علي المواطن المسلم عشان بيأكل اللحم في شهر صوم الاقباط بحجه مراعاه الشعور ؟

هل من حقه و حسب الشرع عنده ان يتهجم علي مواطن في الشارع بياكل سندوتش شاورما في شهر صوم الاقباط؟؟

هل عمرك حتي شفت مواطن قبطي بيتخانق مع قبطي اخر عشان شافه بياكل لحمه في شهر الصوم؟

العقيده الهندوسيه تقدس البقر و نسبه الشعب النباتي مرتفعه جدا ، فهل شفت واحد نباتي واقف في الشارع يتخانق امام كنتاكي عشان بياكلوا فراخ؟

و اتعجب جدا من عباره
" لازم يراعي شعور الصايم"

هو انت ولامؤاخذه حتفطر علي روحك لو شفت حد جنبك بياكل و فاطر او بيدخن سيجاره؟

ما هذا العبث و الهرتله الكذابه..

بلاش والنبي اونطه و عايش دور حامي حمي الدين و ماشي تلطيش في البني ادمين..

تصرف احمق.. تصرف اخرق..
و الهدف منه الفشخره الدينيه و تلاقيه بني ادم بياكل حق غيره و سليط اللسان و عامل روحه راعي الدين !

عارف و متأكد ان كثيرين حيهب يفط ينط يبرر ان الدين امرنا بالنصيحه و المعروف..

لكن من العيب جدا التعاطف مع هذا السلوك او تبريره ..

والنبي تعمل انت معروف و خليك في حالك..بلاش تطاول و قله ادب و انت مالك..

دليلي علي صحه كلامي هو انك لن تجد ابدا انسان مؤمن متدين ورع و تلاقيه ماشي في الشارع يشخط في اللي لا يؤدي الصلاه او اللي فاطر رمضان..

فكر بس كدا بهدوء و راجع امثله الشخصيات الورعه عن حق، حتلاقيه حاجه تانيه غير المتشنج المتعصب اللي يرغي و يزبد يتفتف و يصرخ..

حسبي الله و نعم الوكيل ..
الله الخالق سبحانه و تعالي برئ من سفاهه البشر المتنطعين..

بس خلاص
اسامه شوقي