مايع .. د.مجدى إسحق 
مايع ، فاتر ، لا سخن و لا بارد ..
لما تتكلم معاه ييجى معاك زى ما تجيبه ، يمين يمين ، شمال شمال ..

ما لوش رأى محدد فى أي موضوع : يشوف الناس رايحة فين و يروح معاها .. و من كتر ما خايف حد يهاجمه بقي "و لا حاجة" ، من غير رأي و لا طعم و لا لون ..

لو دورت على الخوف اللي جواه ، تلاقيه لأنه اتربي فى بيت كده : فاتر ، مايع .. أو عاش مكتوم، خوفوه أو حرموه يقول رأيه ..

"المايع" فاكر انه كده ما بيخسرش حد ، و أن كل الناس ح تحبه ..

لكن بعد شوية الناس بتكتشف ضعف شخصيته اللي غالبا بتخللي أي حد يمشيه و يسيطر عليه .. و لو حد عرف نقطة ضعفه دى ممكن يتحكم فى كل قراراته ..
و للأسف المايع فاكر ان دي "طيبة" و هى مش كده ..

الشخص المتوازن حاسم ، حازم ، له رأي واضح و محدد و قوى ، لكن فى نفس الوقت طيب و حساس لمشاعر الناس ..

٣ دروس ؛ اوعى تكون مايع ، و أوعي  تعاشر شخص مايع ، و أوعي تربي أولادك علي الصفة دى !!