مؤمن سلام
عملية تشكيل محور سُني تختلف تماماً عن تشكيل المحور الشيعي الإيراني
فالمحور الشيعي كان يتكون من دولة واحدة هى ايران، ومليشيات تابعة لها، قامت بتمولها وتسليحها لتكون ذراع لها في دولها، وتكون ورقة ضغط في السياسة الدولية، والتي ترتبط مصالحها بمصالح ايران وليس مصالح دولها الوطنية، من الأحزاب الشيعية والحشد الشعبي في العراق إلى حزب الله في لبنان إلى الجهاد الإسلامي وحماس (فرع الإخوان المسلمين) في فلسطين وأخيراً الحوثي في اليمن، فهذه مليشيات مسلحة لا تملك اقتصاد ولا علاقات دولية رسمية، ولا قوة ناعمة، ولا أى مقومات للدولة، وانما تعتمد اعتماد كلي على ايران، وبدون ايران محكوم عليها بالموت، إلا لو تدخلت دولة أخرى لإحيائها.
أما المحور السُني، فهو يتكون من دول، وهى دول ذات ثقل، تركيا، مصر، السعودية، الإمارات، قطر.
فاحنا من أولها كده بنتكلم في 5 دول لكل دولة مصالحها وحلفائها وأعدائها، مش دولة ومليشيات.
فهل السعودية حتحط ايدها في ايد الإمارت قريب؟ هل مصر والسعودية والامارات حتحط ايدها في ايد قطر لدرجة التحالف قريب؟ هل العلاقات المصرية التركية تطورت بهذا الشكل الكبير والضخم بعد سنوات العداء لدرجة انهم يتحالفوا؟ هل قطر وتركيا لوحدهم قوة مؤثرة؟
الفرق بين حكم أردوجان ونظام الملالي
كمان لازم نلاحظ إن أحلام أردوجان حاليا وبعد التخلص من مؤسسي تيار العثمانيين الجدد "عبد الله جل و أحمد داوود أوغلو" على يد أردوجان، أصبحت مجرد أحلام شخصية لو مات أو اختفى ستنتهي بالذات انه ملوش خلفاء واضحين، على عكس نظام الملالي اللي رفع شعار تصدير الثورة من أول لحظة وحتى بعد موت خميني النظام كمل لأن كان في اللي يورث خميني ويكمل وراه ولاية الفقيه.
مين حيقود التحالف
اردوجان صاحب أحلام السيطرة العثمانية؟ ولا بن زايد اللي شايف انه اكتر دولة متطورة في المنطقة؟ ولا بن سلمان اللي شايف نفسه رئيس أكبر وأغنى دولة عربية وصاحب الشرعية الدينية؟ ولا تميم اللي شايف انه بيمول نص المجتمع المدني والجامعات في العالم؟ ولا مصر الأقدم والأعرق والأقوى عسكريا وثقافيا وسياسيا؟
حتقولي قيادة جماعية تراعي المصالح المشتركة، أقولك طب عيني في عينك كده، ده احنا بتوع الزعيم الأوحد.
المحور ده ضد مين؟
واوعى تقولي كلام نشرات الأخبار والبيانات الديبلوماسية بتاع مش موجهه ضد حد، والتعاون والتعاضد والتوافق.
هل ضد إسرائيل؟ وقبل ما تسرح بخيالك مفيش حرب ولا رمي اسرائيل في البحر ولا الحنجوريات دي، ولكن ضد اسرائيل سياسيا واقتصاديا.
هل الإمارات حتدخل في صراع مع إسرائيل حاليا؟ أشك
هل قطر حتدخل في صراع مع إسرائيل حاليا؟ أشكين
هل السعودية عايزه صراع مع إسرائيل ولا تطبيع؟ مش عارفين
يفضل مصر ودي علاقاتها مع إسرائيل دايما بين شد وجذب طول الوقت خاصة في ظل الحكومات اليمينية المتطرفة بسبب فلسطين بشكل رئيسي، ولا اعتقد ان في تنافس اقتصادي وتجاري بين مصر وإسرائيل بالعكس في تعاون تجاري خاصة في مجال الطاقة.
أما اردوجان فراجل بتاع تلات ورقات بيبوس اسرائيل في السر ويشتمها في العلن، وهى خناقة حاليا على مناطق النفوذ في سوريا والموقف من الكورد بالذات.
أيوه بس نتنياهو مأكدلي ان في محور سُني ضد إسرائيل
نتنياهو كرجل يميني متطرف، تعود يحكم بالخوف مش بالأمل، دلوقتي الحرب بتقترب من نهايتها، يمكن على الصيف تكون الدنيا خلصت، ونتنياهو عنده انتخابات في أكتوبر، من مصلحته إن الصراعات تستمر لحد أكتوبر على الأقل، عشان يحافظ على وضع البطل المنقذ المدمر لأعداء إسرائيل، لأن ببساطة لو الحرب خلصت على الصيف فحيكون في فرق شهور بين نهاية الحرب والإنتخابات، سعتها ممكن يختفي أو حتى يخفت بريق البطل ويظهر تاني صورة نتنياهو الفاسد اللي بيتحاكم والفاشل الذي لم يمنع حدوث 7 أكتوبر.
لاحظوا ان اللي خايف من المحور الوهمي ده هو نتنياهو واللي فرحان بالمحور الوهمي ده هو اليسارواسلامنجية.
