ما تجريش الناس وراك

فيه ناس عندها خصلة شديدة الإيذاء : انها تستمتع و هى  بتخللى الناس تجرى وراها !!

جرب كده تبقى واقف مستني عربية تطلع علشان تركن مكانها .. تلاقيه يتعمد يتأخر و كأنه مستمتع يشوفك متضايق و انت مستنيه ، و هو مستخسر يريحك بسرعة !!

 

و فيه من العينة دى امثلة كتير : تتكلم او تبعت رسالة ، يشوفها و ما يكلفش خاطره برد يريحك (حتى لو كان لأ) ..

 أو تطلب طلب و هو فى ايده يعمله ، و لا يسأل فيك اصلا ..

فين ده من واحد عارف ان الانتظار بدون رجاء كله مر و مرار ، فيسرع للناس بالأمل فى رد مريح ، أو استجابة سريعة تعطي قلبهم سلام ، و عقلهم راحة و هدوء ..

 

ما تجريش حد وراك : جبر خواطر الناس مش بس في انك تريحهم و تخدمهم ، لكن فى سرعة الاستجابة ، و شهامة الجدية التى تمنحهم الثقة و الامان و راحة البال ..