ديڤيد ويصا
فيه فكرة منتشرة بتقول ان "الجواز بيقتِل الحُب" ..
فلو عاوز تحافظ على الحُب، متتجوّزش!
لكن بقالي فترة بقرا كتاب لـ "تيموثي كيلر" اسمه "معنى الزّواج" ..
لفَت نظري لحاجات مهمّة في العلاقة بين الجواز والحُب ..
خُلاصتها ان:
الجواز مش بيقتل الحُب، لكنه بيحُطّه تحت اختبار عنيف!
--
في الجواز ..
بتشوف عيوبك زي ما هي بدون تجميل ..
وقوّتها انها بتتقال ليك بوضوح من شريك حياتك ..
وبنفس القَدر، بتكشف عيوب شريكك قُدّامك، وبتقولهاله بوضوح!
--
في الجواز ..
بتشوف صحّة/خطأ ادّعاءك للحب ناحية شريك الحياة ..
في كَمّ التضحية والمسؤولية المطلوبين منك ناحيته ..
وبيشوف شريكك كمان نفس الكَمّ المطلوب منه ناحيتك!
--
في الجواز ..
بتشوف استعدادك انك تشارك كل تفاصيل حياتك مع طرف تاني ..
وبيشوف الطرف التاني نفس استعداده انه يعمل كده معاك ..
لأن دخول طرف تاني لحياتك أمر مزعج ومش سهل أبدًا!
--
في الجواز ..
بتواجِه تحدّيات ومشاكل وصراعات ..
بتواجه احتياجات للطرف الآخَر لازم تسدّدها ..
وبيتواجه الطرف التاني باحتياجاتك المسؤول هو عن تسديدها!
--
في الجواز ..
بتختبر قدرتك على المثابرة والاستمرار ..
لما تلاقي نفسك محتاج تتعلّم انك ..
تغفر للطرف التاني عشان تكمّل ..
وهو محتاج يغفرلك عشان العلاقة تكمّل ..
لأن العيوب صحيح محتاجة إصلاح من صاحب العيب ..
لكنها كمان محتاجة غفران من الطرف التاني!
--
بحسب "تيموثي كيلر" ..
الله عنده أدوات كتير بيشكّلنا بيها عشان نكون مشابهين صورة المسيح ..
لكن "الجواز" هو واحدة من أهم أدواته اللي هيستخدمها في تشكيلنا ..
والتشكيل صحيح مُرهِق وموجِع، لكن نتيجته حلوة ومُشجّعة!
ده مش مبرّر للاستمرار في علاقة مؤذية ..
أو علاقة فيها طرف مصمّم انه يكسَر العهد ..
لكنها جرس إنذار لكل واحد وواحدة بيفكّروا في الجواز ..
عشان يدركوا حجم المسؤوليّة وصعوبة التّحدّي اللي الجواز بيفرضه!
ديڤيد ويصا
