كتب - محرر الاقباط متحدون
وجاء بنص بيان البياضي :"شكر… وعهد يا أهل بلدي الغاليين… يا اللي عمري ما شفت منكم غير الجدعنة والوفاء.من قلبي، بشكركم واحد واحد—في كل مكان داخل مصر وبرّه—على نزولكم وتصويتكم، وعلى الثقة اللي بتجددوها فيّا كل يوم.
ورغم إن النتيجة الرسمية يوم ٢ ديسمبر، المؤشرات بتقول: بيكم ومعاكم… بنبدأ مرحلة جديدة نكمل فيها اللي حققناه خلال السنين اللي فاتت—سنين كنت شايل فيها صوتكم وقضيتكم في كل خطوة.
الكرسي عمره ما كان هدفي… أنتم الهدف.
أنتم الرسالة، وأنتم القضية، وأنتم سبب كل موقف وكل معركة خضتها.
وعهدي قدّامكم—وقدّام ربنا—
إن صوتكم يفضل عالي في البرلمان،
وإن مواقفي ما تتغيّرش، وإن مبادئي لا تتراجع ولا تُباع… مهما كان الثمن.
أنتم اللي صنعتوا الفرق… وأنتم اللي خلتوني أؤمن إن التغيير ممكن وإن الطريق الصعب يستاهل.
واللي جاي أصعب… لكنه أهم. ومش هقدر أكمله لوحدي. محتاج سندكم… محتاج دعمكم… ومحتاج نفس الإيمان اللي وقفتوا بيه جنبي من أول يوم.
وواثق إننا مع بعض هنغيّر… ونفرض صوت الناس… ونبني مصر اللي كل بيت فيكم يستاهل يعيش فيها بكرامة وأمان.
وبيكم… هافضل أقوى. أكون صوتكم اللي ماحدش يقدر يسكّته، وذراعكم اللي ماحدش يقدر يكسره.
