كتب - محرر الاقباط متحدون
أعلنت وزارة الأوقاف، ان موضوع خطبة الجمعة، بعنوان: "مواجهة الإلحاد".
وفي هذا الصدد كتب المفكر والطبيب خالد منتصر عبر حسابه على فيسبوك :"هاتوا لي ملحد مصري فجر كماين ولا قتل جنود ، ولا دبح أقباط؟!!!
وتابع :"اللي قتلوا عثمان كانوا مسلمين، مش ملحدين منضمين للحزب الشيوعي حدتو في الجزيرة العربية،
واللي ضربوا جنودنا وضباطنا بالرصاص في رفح وفي بير العبد وفي مديريات الأمن ، واللي فجروا معهد الأورام واللي حرقوا السبعين كنيسه واللي اغتالوا السادات والمحجوب ، واللي عملوا مذبحة أسيوط ، وحتى اللي حصدوا أرواح المصلين المسلمين في مسجد النهضة…. كل دول كانوا تربية السلفيين المؤمنين، وعمرهم ما قروا ماركس ولا نيتشه ولا سارتر ولا هيجل، معركتكم مش مع اللي بيردد كلام نيتشه ودوكنز ، لكن معركتكم مع اللي بيردد كلام ابن تيميه وعمر عبد الرحمن، رجال الدين عايزين يخلقوا عدو وهمي عشان البيزنس يزيد، ويحسسوكم إنكم في خطر، عمر الفيروس ما ح يفكر يعالج العدوى، وعمر خلايا السرطان ما ح تتنازل عن تكاثرها وشراستها لصالح صحة الجسد، ما فيش تاجر دين بيتنازل عن مساحات مكسبه طواعية.ناقش الملحد مش تسجنه افحمه بقوة منطقك ما دمت شايف إن فكرته مجنونة .
واختتم :" خايف ليه ما دام شايف إن معاك الحقيقة الناصعة اللي لا يمكن حد يشكك فيها ؟!، سجن وقتل صاحب الفكرة مش معناه إن الفكرة نفسها بتموت.وصدقني ربنا مش محتاج بودي جاردات.
