كتب - محرر الاقباط متحدون
علق الكاتب الليبرالي محمد أبو قمر بسخرية على الهجوم الإسرائيلي على الدوحة والذي استهدف قادة حماس.
وكتب أبو قمر عبر حسابه على فيسبوك:"والله ما كان له لازمه الاجتماع ياجماعه ، المسامح كريم ، والقطريين عارفين كويس إن اسرائيل مكنتش تقصد تزعلهم ، كل الحكايه هي إنهم اتخضوا جامد من صوت فرقعة الصواريخ ، وعلشان كده بعد ما فاقوا من الخضه اتعاملوا بحكمة شديدة في الموضوع واشتكوا للمعلم ترامب وهو وعدهم بإن اسرائيل مش هاتخضهم تاني ، والموضوع خلص ، وكل حاجه هاتستمر زي الأول وأحسن من الأول كمان ، المصارين في البطن بتتخانق.
مضيفا:"والحمد لله المسأله ما وصلتش للخناقه ، وبعدين ياجماعه اسرائيل والله كانت طول عمرها بتعتبر قطر دي بنت خالتها ، وقطر من أيام أبو الأمير تميم كانت بتعتبر اسرائيل زي الراجل إللي بيجي يركب وصلة الكهربا.
والله الاجتماع ده ولا كان له أي لازمه ، مش عايزين الكلام يتنطور ، ومش عايزين نعمل من الحبه قبه ، ومكنش له لزوم دعوة الدول الاسلاميه للاجتماع ده لأن جايز رئيس أي دوله اسلاميه يتهور ويطالب في الاجتماع بضرب اسرائيل بالقنبله والموضوع يكبر ومنعرفش نلمه .
وعلي فكره الاسرائيليين اغبيا لأنهم كان المفروض يضربوا ضربتهم دي بصواريخ مكتومه مبطلعش صوت ، لو كانوا عملوا كده قطر والله ما كانت هاتتكلم ، إنما تقول إيه !! اغبيا ضربوا بصواريخ بتعمل بووووم طراخ طيخ طاخ ، طبعا الناس اتخضت ، وكان لازم قطر طبعا تزعل ، إنما لو كانتوا ضربوا بصواريخ مكتومه مبطلعش صوت ولا كان حد هايعرف بإللي حصل ، وممكن جدا قطر في الحاله دي كانت هاتشكر اسرائيل لأنها مخضضتهمش الخضه الكبيره دي.
واختتم :"عموما الحمد لله إن الموضوع اتحل ، والاجتماع طلع حلو خالص مفيش فيه أي كلام ناشف ، وإن شاء الله البيان الختامي هايبقي زي الفل مفيش فيه لا شتيمه ، ولا كلام خارج ، ولا تهديد بالقنابل الحمد لله عدت علي خير.
