الأب جون جبرائيل الدومنيكانيّ
المشهد: كنيسةٌ قديمة، يقف الكاهن إلى جوار شخص ممدَّد على الأرض، يتلو صلاة الطرد، وفجأة يبدأ الشيطان بالتكلّم على لسان الممسوس.
الكاهن:
باسم الربّ يسوع المسيح، آمُرك أيها الروح النجس، اخرُج من هذا الإنسان!
الشيطان (بتنهيدة عميقة):
آخ يا أبونا… هو أنا لسه جوّه؟ والله ما كنت واخد بالي!
الكاهن:
اصمت! واخرج فورًا!
الشيطان:
طب استنى بس، قبل ما تطرُدني، عندي شكوى رسمية!
الكاهن:
الشيطان يُقدّم شكوى؟! ضدّ مَن؟ ضد رئيس الملائكة ميخائيل؟
الشيطان (بغضب ساخر):
لا يا حضرة الأب، ضدّ المسيحيين! المؤمنين بتوعك اللي مفروض إنهم "نور العالم وملح الأرض"!
ضد "الأتقياء" اللي بيصلّوا ويصوموا وبيقولوا "يا رب ارحم" وهم بيدوسوا على الرقاب!
أنا بقيت عاطل عن العمل… الناس سبقتني في الشر!
واللهِ ما مخلّين لي حاجة أعملها! أنا بطّلت أوسوِس، بقت وسوستهم جاهزة جاهزة!
الكاهن:
ماذا تقصد؟
الشيطان (وهو يعدّ على أصابعه):
يا راجل! لسه إمبارح واحد بيصلي في القداس، وأول ما خرج، سرق من المحل اللي جنب الكنيسة!
واحد بيخدم يوم الأحد والجمعة وبيوعظ عن المحبة… وبالليل بيضرب مراته!
واحد تاني بيتقدّم للتناول… ولسه من شوية مزوّر تقارير علشان ياخد مكافأة مش من حقه!
وحدة ماسكة الكتاب المقدّس وبترنّم… وبنفس الوقت بتطرد أختها الأرملة من الشقة عشان الورث!
أنا كنت فاكر إنّي أنا اللي بفسد الناس، طلعوا هم سابقيني بخطوة!
الكاهن:
أنت كاذب منذ البدء!
الشيطان:
كاذب؟! أنا دلوقتي متقاعد رسمي! بقيت أتفرّج بس، وكل مرّة أقول هأوسوس لواحد ألاقيه سبقني وكمل لوحده!
فيه مؤمن بيصلّي للعدالة وبيرشي في الشغل، ومؤمنة بتقول على كل الناس "ربنا يهديهم" وهي بتهتك سِترهم في السرّ!
الكاهن:
إذًا تعترف بأنّ الشرّ الذي فيهم ليس منك؟
الشيطان (يضحك):
أيوه! واللي قاهرني، لما يعملوا عملة سودة، يقولوا "الشيطان ضحك عليّ"!
يعني فوق إنّي مافيش شغل، بيحطّوا اسمي على كل جريمة ببلاش! فين نقابة الشياطين؟!
الكاهن:
باسم يسوع المسيح، آمُرك أن تخرُج ولا تعود!
الشيطان (وهو يُخرَج):
ماشي يا أبونا، ماشي…
بس شغّل مخّك: لما البشر يعملوا شُغلي أحسن منّي…
مين فينا الشرير الحقيقي؟!
وقبل ما امشي، ليا طلب… لو قابلت واحد من "الأبرار"، ابعتهولي… نفسي أشتغل شغلي من غير منافسة!
الأب جون جبرائيل الدومنيكانيّ
