ديڤيد ويصا
هل إبليس يقدر يعمل معجزات، زي خُدّام الله؟
الإجابة: أيوه!
--
زي إيه؟
يقدر يعمل معجزة ظهورات ..
لأنه بيعرف يغيّر شكله وكأنّه ملاك نور (2كور14:11)
ويقدر من خلال ناس شكلهم زي خُدّام الله ..
يخرَّج شياطين ويعمل أعمال خارقة (مت22:7)
ويشفي مرضى ويوهِم الناس ان الشّفا من الله (أع10:8)
--
طب ممكن حدّ يتنبّأ بحاجة وتحصَل، وميكونش من الله؟
الإجابة: أيوه!
والرب حذّر شعبه من الأنبياء الكذَبَة في (تث13)
وقال انهم ممكن يتنبّأوا بحاجات وتحصَل!
--
طب نميّز ازّاي بين اللي من الله واللي مش منّه؟
خادم المسيح مُتّضع وبيرجَّع المجد لله ..
خادم المسيح محترم وبيحِبّ الناس وعاوز خيرهم ..
خادم المسيح فارق معاه حياتك ونموّك في علاقتك مع الله ..
خادم المسيح فارق معاه توبتك ورجوعك لله ..
عُمره ما هيرجَّع المجد لنفسه، ولا هينسِب لنفسه القوّة!
خادم المسيح بيتعامل مع المعجزة كوسيلة، مش هدف ..
الموضوع معاه مش استعراض ولا تسويق لنفسه ولا لخدمته ..
لكن دايمًا هتكون المعجزة وسيلة لرجوعك لله!
خادم المسيح عُمره ما هيربُطَك بيه، لكن هيربُطَك بالمسيح ..
ولو لقاك مربوط بيه، هيزُقَّك بعيد عنه ويوجّهك للمسيح (أع12:14-18)
--
طب هل فيه ناس ممكن تفضل بعيد عن المسيح، حتى لو الخادم أمين؟
الإجابة: أيوه!
لأن ناس كتير فارق معاها المعجزة، حتى لو هتاخُدها من إبليس ..
فارق معاها أكل وشرب وشفا وراحة، مش أكتر من كده ..
وحتى أيام المسيح نفسه ..
فيه ناس كتير كانت وراه عشان تاكل وتشبَع (يو26:6)
--
طب نعمل إيه؟
بلاش انبهار على الفاضي، مهما كان المشهد مُبهِر ..
امتحنوا كلام الخادم وسلوكه وطريقته وأخلاقه ..
اصبروا عليه، ومَتِجروش ناحيته من أول معجزة أو وعظة ..
ومتمشوش ورا حد عمياني من غير تفكير ولا فحص ..
وانتبهوا لحياتكوا وعقلكوا وشخصيّاتكوا وعلاقتكوا مع الله ..
والخادم، مهما كان، محتاج كنيسة وجسد ينتمي ليه ..
يخدمهم ويخدموه، يبنيهم ويبنوه، يتابعهم ويتابعوه ..
جسد يحاسبه لو غلِط، ويشجَّعُه لو عمل صح ..
لأن الخادم يوم ما يكون هو الأول والأخير، هيُقَع ..
لأن مكان الرأس في الجسد محجوز للرب يسوع وحده ..
ومفيش عضو في الجسد، كامل في كل حاجة ..
لكن كل عضو فينا محدود، وبيكتمِل بس لما يكون في الجسد!
ديڤيد ويصا
