كتب - محرر الاقباط متحدون
عرضت فضائية (العربية) تقرير مصور عن شاب نوبي أمين، فرغم انه يعاني ازمة مالية، الا انه قام برد مبلغ 50 ألف جنيه وصلته من تحويل بنكي بالخطأ.
الشاب الذي ضرب مثالا في الامانة يدعى احمد سيد حسن يقيم بقرية ادندان في مركز نصر النوبة بمحافظة اسوان، ولم يفكر لحظة في استغلال الموقف، وعبر برد فعله عن امانة واخلاص اهل النوبة.
رفض احمد تقاضي اي مكافآت واكد انه يريد تربية ابنائه على الحلال، وقال :" كنت بفكر ادفع القسط ازاي وكنت سايب كل حاجة على الله .
وتابع :" لما لاقيت واحد بيتصل انا افتكرت ان هو مثلا بيهزر ، وبعد كده طلع فعلا بجد ، على طول مافكرتش ولا اترددت لحظة اني ارجعهمله على طول.
موضحا :" رحت البنك الصبح سألت الموظف اللي على التلر، قولتله رقم الحساب بتاعي دا نزل فيه فلوس ؟ .
وتابع :" قالي ايوه فيه فعلا ٥٠ الف جنيه في الحساب، قولتله الفلوس دي مش بتاعتي وجت عندي بالغلط .
موضحا :" قمت بالحصول على المبلغ عن طريق عملية سحب، وطلبت من الموظف تحويله على رقم الحساب الذي ارسله على حسابي عن طريق الخطأ .
وتابع :" ارسلت لصاحب الحساب صورة من ايصال تحويل المبلغ الى حسابه.
لافتا :" غمرت الفرحة الرجل، كذلك انا كوني سارعت برد هذا الحق لصاحبه.
وأشاد رواد مواقع التواصل الاجتماعي باحمد لأمانته، والذي سارع برد المبلغ لصاحبه دون تفكير، وكتب حساب باسم محي :" اخلاق النوبة الجميله ربنا يكتر من امثالك #ابن اسوان _ النوبة _ ادندان .#احمد سيد حسن ربنا يكتر من امثالك حفظك الله وبارك فيك ويزقك الحلال الطيب.
وعلق رامي :" فعلا والله اطيب واحن قلب والجدعنا كلها ناس النوبه المحترمين.
وفي رسالة للاعلام كتب حساب باسم محمد :" دي بقا الناس الي تستحق تطلع ترند.
وعلق طارق :" ربنا يحفظه ويبارك فيه ويكثر من امثاله الأخ المحترم احمد ابن قرية ادندان عمل ما هو مغروس فيه من الأمانة والاحترام والأخلاق ربى يحفظك ويسعدك دوما.
كما اشادت بامانته، قناة (أون) وكتبت عبر صفحتها الرسمية على فيسبوك : "أحمد سيد حسن" مواطن مصري من النوبة وتحديداً من قرية أدندان مركز نصر النوبة محافظة أسوان.. فجأة وهو قاعد فوجيء برسالة على موبايله من البنك اللي بيتعامل معاه إن فيه مبلغ 50 ألف جنيه اتحولوا لرصيده!.. طبعاً أى حد مكانه بعد مرحلة الاستغراب ممكن يفتكر إن دي هدية من شخص مجهول حب يبعتله حاجة تسعده!.. بس ده مش منطقي ومفيش حد بيوزع فلوس بالأرقام دي!.
بعد لحظات جت مكالمة لـ "أحمد" من شخص قال له إن الفلوس اللي وصلت له دي فلوسه وتم تحويلها بالغلط لحساب "أحمد" وبيستأذنه بإلحاح يرجعله المبلغ!.. "أحمد" اتأكد من هوية الراجل وطلب منه مهلة لتاني يوم وفعلاً من الصبح بدري وبمجرد ما البنوك فتحت كان "أحمد" متواجد عشان يسحب المبلغ ويرجعه لصاحبه!.
صاحب الفلوس حب يدي "أحمد" أى مكافأة مقابل أمانته بس النوبي الجميل رفض وقال إنه معملش حاجة تستحق المكافأة وإن أمانته دي حاجة طبيعية.. بالمناسبة.. "أحمد" لو كان رفض يرجع المبلغ للراجل محدش كان هيقدر يعمل له حاجة لإنه ما أجبرش حد يبعت له الفلوس خصوصاً كمان إن دي غلطة اللي أرسل مش اللي استقبل بس أخلاقه هي اللي قالت كلمة النهاية للقصة البسيطة العظيمة دي.
من شهرين أطلقت الشركة المتحدة للخدمات الإعلامية حملة "أخلاقنا الجميلة" واللي هدفها التأكيد على الأخلاق الحميدة اللي بتأمرنا بيها كل الأديان السماوية والإنسانية من احترام الكبير وحسن الجيرة وحسن المعاملة والأمانة والشرف والأدب وغيرها من التقاليد اللي اتربينا عليها زمان.. بالتزامن مع الحملة حصل الموقف ده وغيره عشرات ويمكن مئات المواقف التانية اللي بيقولوا إن أخلاقنا بخير ومُلهمة وهتفضل كده وعشان كده الحملة دي هتنجح لإن في كل محافظة وكل شارع وكل بيت مصري فيه عادات أصيلة راسخة في وجدان كل مواطن لا بتروح مع الزمن ولا بيلغيها ظروف.
واستنكر عدد من المعلقون ربط امانة الشاب النوبي بالحملة ، وقالوا ان الحملة ليس لها دخل في امانته، حيث طالما هو شخص امين كان سيرد اي مبلغ يعثر عليه قبل انطلاق الحملة .
والسؤال : كيف سيكون تصرفك لو حول اليك مبلغ عن طريق الخطأ ؟.
