كتب - محرر الاقباط متحدون
ظفر المخترع المصري (مايكل فريد) باشادات واسعة من قبل رواد موقع التواصل الاجتماعي فيسبوك، حيث تداولوا منشور يتحدث عن ابتكاره آلة طبخ وجاء فيه :
الشاب المصري "مايكل فريد" هو واحد من الأسماء المصرية المشرفة في الخارج واللي تم اختياره ضمن قائمة المبدعين الشباب تحت سن 30 من مجلة "فوربس" لإن وغير إنه الشريك المؤسس والرئيس التنفيذي لواحد من أهم المطاعم العالمية في أمريكا؛ لكنه برضه ابتكر آلة طبخ لأول مرة!.. إيه الحكاية؟..
في حواره مع الصحفي "محمود راغب" بيقول "مايكل" إنه اتولد في دبي ولما عمره وصل لـ 18 سنة سافر لـ بوسطن في أمريكا عشان يدرس الهندسة الميكانيكية لإنه كان حاسس من صغره إن شغفه في الهندسة وإنه هيكون قادر ينجح فيها.. درس الميكاترونيكس في جامعة mit في بوسطن، ولما خلص بدأ في الماجستير عن الروبرت.. وهو بيجهز الماجستير اكتشف إنه ماعندوش وقت خالص عشان يطبخ بنفسه وكمان الأكل الجاهز اللي من بره مش صحي وأضراره كتير غير إنه غالي ففكر إنه يخترع ماكينة تقدر تطبخ!.
دور على أصدقاء له عندهم نفس المشكلة عشان ينفذوا المشروع ده.. قدموا الفكرة للجامعة وقدمت لهم منحة 1000 دولار عشان يعملوا أول نموذج من الروبوت.. "مايكل" وفريقه اخترعوا بالفعل ماكينة صغيرة لما اتعرضت على أساتذة متخصصين في الطبخ حازت على إعجابهم وانبهارهم بيها.. بعدها قدموا على منحة تانية أكبر للجامعة ورغم إن كان فيه تنافس كبير المرة دي بس نجحوا برضه ياخدوا منحة جديدة بس بـ 20 ألف دولار وعملوا ماكينة أكبر وأفضل وتقدر تعمل أكلات صحية متكاملة.
الماكينة لو موجودة في مطعم أو في شركة أنت كـ عميل بتقدر من خلال جهاز لوحي موجود قدامك على الترابيزة إنك تختار من قائمة بتتضمن وجبات متنوعة ومتكاملة زى الباستا والرز والفراخ والخضار والسمك والجريل والمشويات، وتقدر تشوف وجبتك أثناء تجهيزها فيها.. الماكينة بتنتج 400 وجبة في الساعة يعني حوالى ما يقرب من 6 وجبات في الدقيقة وتجهيز الوجبة لا يتعدى دقيقتين وبتخرج طازة.
"مايكل" بيحلم بتنفيذ المشروع في مصر وبيقول إن فيه أكتر من 150 مطعم في أمريكا اشتروا الفكرة منه.. نموذج مصري مُلهم نتباهى ونفخر بيه زيه زى ملايين النماذج المبدعة اللي رافعة اسم وعلم بلدها في الخارج.
