كتب – نعيم يوسف
أكدت الإعلامية مها بهنسي، المذيعة في قناة "التحرير"، خبر وقفها عن العمل مؤكدة، أنها ستعود مرة أخرى، وذلك خلال تدوينه لها على موقع التواصل الاجتماعي "فيسبوك"، قالت أنها سوف تكون "أخر كلمة" في هذا الأمر.

وقالت بهنسي، "خبر إيقافي عن العمل صحيح بس راجعه تاني أن شاء الله و لكن دي اخر كلمه هقولها في الموضوع دا علشان مش هتكلم فيه تاني، و"احب اشكر الناس اللي بعتتلي الاف الرسائل و مئات التليفونات التي لم تتوقف لدعمي و التضامن الكبير معايا لفهمهم ما حدث من تشويه لي".

وأضافت أن "المعركة اللي ضدي معركة سياسيه و ليست بسبب تصريحات بدليل أنهم نسيوا الجناة و المجني عليها و مسكوا في كلمه غير مقصوده علي الهواء و لكنني لن اضعف و سأظل أحارب كل من خان مصر و سأظل ادعم كل مؤسسات الدولة من جيش و شرطه و قضاء . و لازم تفهموا أن الحرب الجايه هتكون ضد نساء مصر علشان شلنا أرواحنا علي أكتافنا و أنقذنا البلد من الخونه و الارهابيين بنزولنا في استفتاء الدستور و انتخابات الرئاسة".

وتابعت: "فكر لو لثانيه مش ممكن اكون انا صح حتي لو 1% و فعلاً تصريحي ( الشعب مبسوط خليه يهيص ) كان علي فرحة الناس مش علي واقعة التحرش !! و الأغرب أن الناس اللي قال ايه بيدافعوا عن الستات اللي بيتم التحرش بيهم جايين الصفحة يشتموني و يتوعدوني بالتحرش و الاغتصاب , علشان بس تفهم أنهم بيحاربوا شخصي لدوري في محاربتهم و كشف حقيقيتهم و طبعا اقصد الإخوان و الطابور الخامس".

وأضافت: "طيب فكر كمان ثانيه تانيه، واحده مؤيده للجيش و للسيسي و انتخبت السيسي و لم تتوقف عن دعمه " اللي هو انا " هقوم افرح في ست زيي مؤيده للسيسي زيي نازله تحتفل بفوز السيسي زيي ان كلاب سعرانه اتحرشوا بيها !! أي منطق و أي عقل يصدق الكلام دا".

وجددت بهنسي اعتذارها، وقالت: أحب اعتذر لكل مرأه و رجل تأثروا بالفيديو و التصريح الغير مقصود نهائياً و من الطبيعي أن أي حد عاقل لا يمكن يصدق أن مرأه تؤيد التحرش و التحرش مرفوض بكل معاني الكلمة و لو وصل الحكم علي المتحرش بالإعدام هكون من أول مؤيدي الحكم".