أيمن غالى
في زيارتي لميلانو في نهاية 2011 وبداية 2012؛ جذب إنتباهي لافتة محل جزارة مكتوب عليه "لحم حلال" ..
سألت أهل البلد: يعني إيه لحم حلال وبيجيبوه منين ؟
الرد كان مفاجأة وبيحل مشاكل "حلالية" كتيرة ..
أولا: ما فيش غير مجزر عمومي واحد في ميلانو ومستحيل حد يدبح خارجه لا حلال ولا حرام .. وكل عمليات الدبح إللي بتتم حرام في حرام وبيتم الدبح في يوم واحد في الأسبوع
ثانيا: بيتم عمل مزادات علي اللحوم وفي أول يوم الأسعار بتبقي أعلي سعر لأن اللحوم طازجة وبتشتريها المحلات الكبيرة والمحترمة، وفي اليوم التاني بتبقي أقل واليوم التالت أقل سعر ممكن ..
ثالثا: أصحاب محلات اللحوم الحلال بيشتروا مبيعات اليوم التالت للدبح؛ يعني لحوم طالع دين أبوها
سألت:
¤ يعني إنتم عارفين ومتأكدين إن اللحوم دي لا هي حلال ولا يحزنون وإنها أردأ أنواع اللحوم
- أيوة طبعا
¤ طيب ليه ما بتشتروش من محلات الجزارة الإيطالية المحترمة وبتشتروا من المحلات إللي بتتعامل مع أردأ أنواع اللحوم دي ؟
- علشان مكتوب عليها حلال
¤ ما أنت عارف ومتأكد إنها مش حلال
- أيوة عارف ومتأكد بس أنا إللي يهمني إن كلمة حلال تكون مكتوبة وإن إللي كاتبها متحمل وزرها .. يعني أنا كده بأشتري لحوم عليها وزر وواحد غيري متحمل وزرها .. يعني لحوم منزوعة الوزر
¤ واللحوم دي أغلي ولا أرخص من لحوم السوق ؟
- طبعا أغلي
¤ ليه أغلي وهي أردأ أنواع اللحوم ؟!
- علشان حلال
نفهم من كده إن اللحوم الحلال في الغرب هي اللحوم إللي طالع دين أبوها وإللي محلات اللحوم الحلال بتشتريها قبل إعدامها في اليوم التالت من دبح الدبايح ..
وبالتالي الديسكو الحلال المعلن عنه في جدة بالمهلكة هو ديسكو طالع دين أمه .. علشان كده بقي ديسكو حلال زي اللحوم الحلال إللي طلع دين أمها
حا يقدموا خمور مكشوفة ورقصات وموسيقي بايته ومعطنة وحا يجيبوا فتيات ليل منقوعة في براميل طرشي ..
