مصر 3 حروف

بقلم- بيــتر بدوي عطية | الاربعاء ٢٥ يوليو ٢٠١٢ - ٠٠: ١٢ ص +03:00 EEST

حجم الخط :

مصـــر بلدنا طل وشوف
يا دنيا وتايهة ف 3 حروف
يا حضن وحصن..
يا جنة وسجن وصحرا..
وشادوف
مصـــر يا شارع طوالي
آخره سد
حتى وأنتِ حاضنة نيلك
نبع خيرك..
خانقاه بسد
مصـــر يـا أم الشمس حامية
مصـــــر يـا أم الضلة حامية
في بلدي أحلى ورد بلدي
وفيها أصغر رغيف بلدي
مصــــر يا أم الإنسانية
فيكِ فقر وعشوائية
قوليلي ليه يا أم الكرم
كلنا بقينا ضيوف؟
ليه بنيتي بينا سور؟
ليه كرهتي إني أثور؟
مش عارفة أنه لولا ضربتي بفاسي ف أرضك..
كانت تبور
خايفة عليا.. بتحضنيني؟
وحاسس إنك بتقيديني
محرّمة الأحلام عليا
ومعتمة ف عنيا الشوف
بموت فيكِ يا بلدي
بموت فيكِ يا بلدي
وكل ثانية بموت
بموت فيكِ يا بلدي
وهفضل مستحلي الموت
ومستنيكِ تبتسمي وتلبسي التاج..
تترسمي
تنسي أحزانك
وتنسي أحزابك
وتنسي اللي مزعوا يوم ف تيابك
وترجعي لينا..
قمر بنور إنجيل قرآن
بينهم دستور
ترجعي مصر 3 حروف
نتحدى بيها وفيها الظروف
وتبقي حصن وتبقي حضن
تنادينا تلاقينا..
في أول الصفوف

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :

تقييم الموضوع :