مارك مراد مؤسس "ScribeMe" لمساعدة المكفوفين: ظهوري مع منى الشاذلي من أهم الحلقات بالنسبة لي.. حققنا رقما قياسيا في استخدام التطبيق

 

قال مارك مراد، مؤسس تطبيق "ScribeMe" لمساعدة المكفوفين:"الـ 24 ساعة اللي فاتوا يمكن يكونوا أحلى وأكتر 24 ساعة مجنونة في حياتي، 

حلقة امبارح مع الاعلامية منى الشاذلي كانت واحدة من أهم الحلقات بالنسبالي، خصوصًا بسبب التأثير اللي حصل بعدها.

 

 

مضيفا عبر صفحته الرسمية على فيسبوك:"تليفوني تقريبًا طول الوقت بيرن من كتر الرسايل والناس اللي بتقولي قد إيه هما فخورين باللي قدرنا نحققه، إحنا حققنا رقم قياسي غير عادى، المستخدمين استخدموا ScribeMe أكتر من 15000 دقيقة، يعني حوالي 250 ساعة استخدام خلال 24 ساعة بس، ومن المصريين فقط. بخلاف باقى العالم، والاجمل إن الرقم ده لسه بيزيد بشكل مذهل، ومش بيوقف، وطبعًا مع كل الاستخدام ده، التكلفة كمان بتزيد بشكل كمان مذهل.

 

وواصل:"بس مفيش مشكلة، طول ما المصريين مبسوطين، أنا مبسوط، عايز أشكر كل شخص اتفرج على الحلقة، وآمن بينا، وحمّل واستخدم التطبيق،

وعايز أشكر بشكل خاص فريق ScribeMe العظيم على كل المجهود اللي بيعملوه،كل ده مش أنا لوحدي اللي بعمله.

 

 

وأضاف:"ده تأثير فريق ScribeMe كله، الفريق اللي بيفضل سهران لحد الصبح، بيشتغل على خصائص جديدة، وبيصلح مشاكل ، وبيتعامل مع كل حاجة بتحصل بشكل لحظى علشان نقدر نوصل للي إحنا وصلناله النهارده، وطبعًا، لازم أشكر عيلتي العظيمة على كل الدعم اللي قدموهولي، مفيش حاجة من دي كانت هتحصل من غيرهم، هما اللي فضلوا دايمًا يدفعوني لقدام، ويخلوني أتخطى حدودي وأوصل لأبعد مما كنت متخيل، وزي ما بقول دايمًا:دي لسه البداية.