محمد أبو قمر: عندما يدخل الدين في السياسة يمتد إلى الفن والرياضة والتعليم والإعلام والاقتصاد والطب

كتب - محرر الاقباط متحدون 
قال الكاتب محمد أبو قمر:"لما الدين يدخل في السياسة مش هايبقي شيء غريب إنك تلاقي الدين دخل في الفن بمختلف أنواعه ، وفي الرياضه ، وفي التعليم ، وفي العلم ، وفي الاقتصاد ، وفي الطب ، وفي الإعلام طبعا .

مضيفا عبر حسابه على فيسبوك:"عادي جدا وبيبقي شيء مقبول إن الراقصه تقول : أنا بقرا سورة البقره قبل ما أطلع أرقص ع المسرح ، والممثل يقول : أنا ممكن أمثل دور حمار إنما مش ممكن أعمل دور اضطر فيه إني أبوس البطله علشان دا حرام، ومتستغربش لما تلاقي شكل لعب الأطفال اتغيرت ، أو الدعايه عن بعض المنتجات زي مثلا ( مدبوح حسب الشريعه...أو محفوظ طبقا للشرع...).

لافتا:"لما الدين يدخل في السياسه الخطاب الديني بيفرشح جامد ويبقي هو الفكر إللي مفيش فكر غيره ، ويبقي هو المحتوي الوحيد للثقافه ، والآليات الرئيسية للنقد، لما الدين يدخل في السياسه الدعاه بيبقوا أكتر من الأطباء والمهندسين والكيمائيين والفيزيائيين وعلماء الاجتماع وعلماء التاريخ مجتمعين ، بل إن في الحاله دي الداعيه بيغني عن وجود أي عالم في التخصصات دي كلها لأن الخطاب الديني فيه كل حاجه ، فيه الهندسه وعلوم الفلك ، والطب ، والفيزيا ، فيه كل حاجه ، والداعيه بيبقي واخد راحته ويبقي من السهل جدا إنه يفتي بترك مريض الفشل الكلوي بدون علاج حتي يموت ، أو يفتي بإن اختراع المنديل الورقي أفضل وأكتر فائده من اختراع القمر الصناعي .

وواصل:"الكلام عن الجن العاشق والجن الحرامي والجن إللي بيراقب الستات وهما بيستحموا والجن إللي بيلبس الستات بيبقي كلام طبيعي ومسموع ومقبول ومحدش بيعترض عليه ، بل إن الناس بتبوس إيد الشيخ إللي بيقول الكلام ده وبيترجوه إنه يدعي لهم علشان يدخلوا الجنه من غير حساب.

وأضاف:"خرافة الإعجاز العلمي ناتجه عن تداخل الدين في السياسه ، الدين بيتحول يبقي علوم ، والعلوم بتبقي خرافات عقليه ، والعقل بيبقي قاصر ، دا لو كان له لازمه من الأساس ، والأرض بتبقي مسطحه ، والكوره بتبقي مفلطحه ومابتتدخلش جون إلا بدعا الوالدين، متعرفش ليه أذواق الناس بتتغير ، حتي لغة التعامل فيما بينهم بتتغير ، ودرجة العصبية بترتفع شويتين ، وقبول الآخر بيقل كتير ، والكراهيه بتزيد ، ومتعرفش ليه المرأه بتحتل 80% من الخطاب الديني ، وبتبقي علي لسان إمام الدعاه مصرف لتصريف شهوة الراجل ، أو إن المرأه المحجبه هي إللي يطمن زوجها إن الأولاد إللي أنجبتهم له هم أولاده ، يعني إللي مش محجبه لازم زوجها ياخد باله أحسن تكون جايبه عيالها من الحرام .

وتابع:" رجل الدين في الحاله دي بيبقي عالم ، والعالم الحقيقي كأنه نجار مسلح بيروح الصبح يدق المسمارين بتوعه ويروح ، الدين لما بيدخل في السياسه كل حاجه بتدخل في كل حاجه ومحدش بياخد باله إن الأمور داخله في بعضها ، حتي لما أستاذ كبير في تخصص طبي مهم قال إن صلاة الفجر بتعالج ارتفاع ضغط الدم وبتظبط السكر الناس فكرت إن بيوصف علاج حقيقي ، ولما أستاذ تاني وصف الجبنه المطبوخه كعلاج من كل الأمراض الناس مخدتش بالها إن الدور التالت بتاع دماغه كان وقع.