بعد واقعة التشيرتات.. الشيخ ياسر محمود سلمى يحذر من استعراض الهويات الدينية في الشارع :عاوز أشوف "أنا مسلم" في أخلاقك

علق الشيخ ياسر محمود سلمى على واقعة الملابس الجهادية، حيث تداولت أنباء عن القبض على بائع في مصر، بعد انتشار منشورات عبر مواقع التواصل الاجتماعي بشأن بيعه ملابس تحمل عبارات ذات طابع ديني.

 

 

وكتب سلمى عبر صفحته الرسمية على فيسبوك :"كاتب أنا مسلم؟!،طيب أنا عاوز أشوف «أنا مسلم» دي في سلوكك، في أخلاقك، في معاملاتك، في أمانتك، في رحمتك بالناس، وفي احترامك لغيرك، مش عاوز أشوفها مكتوبة على تيشيرت وخلاص!.

 

 

مضيفا:"لأنك لو هتبدأ تكتب هويتك الدينية والقومية على هدومك وتنزل بيها الشارع، بكرة واحد يكتب «أنا مسيحي»، وبعده واحد يكتب «أنا نوبي»، وبعده واحد «أنا كيميتي»، وبعده واحد «أنا عربي»، ونفضل كل شوية نطلع بهوية جديدة، ونحول المجتمع لجماعات وفئات وقوميات وطوائف، وكل واحد بيعلن نفسه في مواجهة التاني، يا جماعة إحنا كلنا مصريين.

 

ونصح:"دينك وعقيدتك وانتماؤك الثقافي احتفظ بيهم واعتز بيهم، لكن متحولش الشارع لساحة لاستعراض الهويات وإثارة الفتن والانقسامات، عاوز أشوف «أنا مسلم» في أخلاقك، خلي الناس لما تتعامل معاك تقول:ده فعلا مسلم... شوف أخلاقه، شوف أمانته، شوف رحمته، شوف معاملته للناس.

لأن «أنا مسلم» مش كلمة تتكتب على تيشيرت، أنا مسلم دي حاجة المفروض الناس تشوفها فيك قبل ما تقراها على ضهرك.