الشيخ ياسر سلمى عن أزمة مطعم مول العرب : الجماعات المتأسلمة غذت في عقولهم فكرة أن الإسلام دائما محارب

كتب - محرر الاقباط متحدون 
علق الشيخ ياسر محمود سلمى ،على واقعة منع زائرة من أداء صلاة الظهر داخل مطعم بمول العرب والتي انتهت باعتذار إدارة المطعم وإيقاف الموظف وإحالته للتحقيق.

وكتب سلمى عبر صفحته الرسمية على فيسبوك:"طب أنت عارف لو المول مش عامل مسجد ولا مكان مخصص للصلاة وإدارة المول قالت للناس: مفيش مسجد صلوا في المطاعم أو  صلوا في المحلات، أو في أي حتة فاضية، أو أي ركن... كانوا هيقوموا الدنيا ومش هيقعدوها! وساعتها كانوا هيقولوا: أزاي نصلي في المطاعم دي إهانة للدين واستهتار بشعائر الإسلام 
و المول ده بيحارب الإسلام، ومانع وجود مسجد داخله! وإحنا في دولة مسلمة، إزاي يبقى فيه مول مفيهوش مسجد؟! ودي مؤامرة على الإسلام!


وتابع :" ليه؟ لأن الناس دي اتربت على فكر الجماعات المتأسلمة الجماعات اللي غذت في عقولهم فكرة إن الإسلام دائمًا محارب، وإن فيه خطة مستمرة لهدمه !! وإن هما بس المسلمين وأما باقي الشعب فدول أعداء للدين فلازم يشوفوا الفكرة دي قدامهم على أرض الواقع. ولو الفكرة دي مش موجوده في الواقع  هيخلقوها. ولو مفيش عدو... هيخترعوه.
لأنهم لا يعيشون إلا على وقود الكراهية، فلازم يبقى فيه مؤامرة، ولازم يطلعوا ضحايا، ولازم يبقى فيه ناس بتحاربهم.

واختتم:"هوس دائم بأن الدنيا كلها ضدهم، وأنه لا بد من عدو، ولا بد من حرب، ولا بد من كراهية، ولا بد من مؤامرة.