ياسمين الخطيب عن واقعة مطعم مول العرب :المنشآت العامة ليست مُلزمة بتوفير مسجد للزبائن .. كل شبر في مصر فيه مسجد

علقت الإعلامية ياسمين الخطيب،على واقعة منع زائرة من أداء صلاة الظهر داخل مطعم بمول العرب والتي انتهت باعتذار إدارة المطعم وإيقاف الموظف وإحالته للتحقيق.

 

وكتبت الخطيب عبر حسابها على فيسبوك :"موضوع مطعم سيزلر ده عجيب جداً،المطاعم ومحلات الملابس والبنوك والسينمات، وكل المنشآت العامة، مش مُلزمين يوفروا للزباين مسجد داخل المكان، مصر فيها في كل شبر مسجد كبير أو مُصلى.. طب بانيين المساجد دي كلها ليه؟!.

 

 

وتابعت:" زنقت معاكي يعني تصلي وسط مطعم؟! ولما المدير يقولك روحي المُصلى (إللي في نفس المول على فكرة)، يبقى كافر ومتآمر على الإسلام؟! 

يعني المُصلى موجود.. وفي نفس المول.. بس يا نصلي في المطعم يا نلبسكم مصيبة!, زي بردو الراجل إللي ضاقت به الأرض بما رحبت، فوقف يصلي جوه البحر! لأ ومخلي حد يصوره! دي مش تقوى.. ده استعراض.

 

ورأت :"والإصرار على تكبير الموضوع، ونشر القصة على السوشال ميديا باعتبارها مظلومية كبرى، لاستنفار مشاعر العامة.. والحقونا وضاع اسلامنا..

هو استمرار لظاهرة التدين الظاهري إللي -للأسف- تفشت في مجتمعنا، وابتزاز للمطعم إللي كان هايتخرب بيته بالمقاطعة، لولا إنه اعتذر!.