فيديو .. الأنبا رافائيل ينتقد ظاهرة مرنمين ومرنمات مواقع التواصل والنهضات : الترنيم في الكنيسة له رتبة كنسية اسمها الابصالتس .. الحق حق

رد نيافة الأنبا رافائيل، أسقف عام كنائس وسط القاهرة، على سؤال جاء فيه: "لماذا تترك الكنيسة المرنمات على مواقع التواصل الاجتماعي؟ فمن المفترض أن لقب مرنم يُمنح عن طريق الكنيسة، لا أن يقوم أي شخص بإنشاء صفحة وينشر فيديوهات وصور باسمه، كما أن المرنمات يتقاضين أموالا، إذا  ذلك ليس خدمة".

 

وقال نيافته خلال برنامج (تيناهتي) المذاع عبر قناة (مي سات ) :"أنا فعلا مش مبسوط من الموضة دي، إن في واحد يبقى لقبه المرنم وواحدة لقبها المرنمة فلانة.

 

وتابع:" أولا، الكنيسة ليها نظام، والنظام ده موضوع من زمان، والترنيم في الكنيسة له رتبة كنسية اسمها الابصالتس، يعني المرتل.

 

موضحا:"والمرتل بياخد بركة إن الأسقف بيرسمه إبصالتس ويبقى شماس من ضمن الشمامسة.

 

لافتا:"طبعا البنات مالهمش رتب شماسية إلا في التكريس، يعني تبقى مكرسة في البتولية أو في الترمل.

 

وتابع:"وبياخدوا رتب برضو شماسية بيد الأسقف، بس ما تطلعش اسمها المرنمة فلانة، بتبقى المكرسة، ومش مسموح لها إنها تقول ترانيم وتسجلها وتنزل ألبومات وفيديوهات.

 

وواصل:"الحقيقة دي، أنا عارف إن في ناس هتزعل مني، لكن الحق حق، أي حاجة بتبتدي صغيرة بتفلت.

 

وأضاف:" أرجو الآباء الكهنة، كفاية بقى حكاية إن في نهضة العذراء نشوف المتكلم الأنبا فلان، واللي بيحيي الليلة المرنمة فلانة، عيب يعني، أو المرنم فلان". 

 

ونصح :"إحنا عندنا عشية، وعندنا عظة، ولو عايزين ترانيم يبقى في كورال الكنيسة، أو كورال آخر جاي معزوم، مع بعضيهم بيقولوا ألحان وترانيم كويسة.

 

وتابع :"حكاية إن في بنت ماسكة الميكروفون في الكنيسة وتقود، أنا شخصيا مش مستريح لها، وأرجو يبقى فيها كنترول، عشان الموضوع عمال بيزيد.