خالد منتصر: الأهلي يستعين بشيخ قبل مواجهة سيراميكا.. دروشة.. ايه اللي بيحصل ده!.. الرياضة بقت علم ودراسة

كتب - محرر الاقباط متحدون 
استعان النادي الأهلي بشيخ لتلاوة القرآن في غرفة الملابس قبل مباراة سيراميكا، وفقًا لما نقله موقع صدى البلد عن الإعلامي عمرو الدرديري.

علق على الواقعة المفكر والطبيب خالد منتصر، وكتب عبر حسابه على فيسبوك :"أنا لا أهلاوي ولا زملكاوي 
وتركت تشجيع الكورة من فترة الاعدادية ، لكني لم أكن أتخيل إن العقول في عالم الرياضة وصلت للدرجة دي من الدروشة ، لدرجة استعانة أكبر نادي رياضي في مصر بشيخ عشان يفك النحس ، معقول نبرر الهزائم بنقص تدين اللاعبين!!طب ايه رأيهم في عدم حصول فريق من دولة عربية أو اسلامية ، ومنتخب من اللاعبين المسلمين على كاس العالم في تاريخ الكاس؟؟!.

مضيفا:"هل ما فيش لاعب سعودي أو مصري كان بيقرا قران للفرقة في الكاس؟!هل في مباراة انبي لعيبه الأهلي مقروش الفاتحة في الملعب؟!على كده أفغانستان والصومال اللي بيطبقوا الشريعة يكسبوا كاس العالم وهما قاعدين في الكهف؟؟!، ده المدرب ومدير الكورة الزبيبة في دماغهم وبالرغم من كده في المركز ال ١٥…!!!!.

وواصل:"ايه اللي بيحصل ده ؟! ده ناقص نقول معمول لهم عمل في قرن تور ، ونجيب شيخ يفك العمل ؟؟! يا جماعة الرياضة بقت علم ودراسة ، واللاعب لو بوذي أو ملحد وبيطبق العلم للوصول للحد الأقصى من اللياقة البدنية والمهارية ح يتفوق على اللاعب اللي بيلعب بالبركة ولو معتكف ٢٤ ساعة في السيده نفيسه!!.

واختتم:"طبعاً لو الأهلي كسب حيبقى الشيخ جاب لهم البركة !!، مع ان الفوز للأهلي بالورقة والقلم وفرق المستوى طبيعي ، لكن لازم جرعة الدروشة ونفاق الألتراس وتدليك الغدة الدينية للشارع، شيخ الأهلي وبخور في غرفة الملابس، منتخب الساجدين، للزمالك رب يحميه.