أبو قمر: الفتيات المصريات الجميلات يستقللن وسيلة غير إنسانية خطرة للذهاب إلى المزارع لجمع العنب

كتب - محرر الاقباط متحدون 
شارك الكاتب محمد أبو قمر صورة تظهر مجموعة من الفتيات المصريات، واقفات داخل صندوق خلفي مكشوف لشاحنة تسير بسرعة على أحد الطرق، أثناء توجههن إلى المزارع لجمع العنب، ما يعرض حياتهن للخطر، حيث وسيلة النقل هذه غير آمنة.

وكتب ابو قمر عبر حسابه على فيسبوك :"آه يامصر يا أم الشقيانين ، البنات المصريات الجميلات دي بيركبوا الركوبه الغير إنسانيه دي علشان يروحوا يجمعوا العنب.

مضيفا :" يقوم الجماعة إياهم وهما بيطفحوا العنب يقولوا علي البنات دي إنهم ناقصات عقل  ، وإذا واحده منهم كشفت شعرها يولولوا ويقولوا البنت بتثيرنا وعايزانا نرتكب الفواحش ، أهي في الحر إللي إنت بتنفخ ومش طايقه مش بس لابسه حجاب إنما لابسه كمان تحت الجلابيه بنطلون لأنها عارفه إن عينك إللي تندب فيها رصاصه بتقلبها من فوق لتحت، ولما الغلبانه الشقيانه دي تتجوز إنت مش بتسيبها في حالها ، لأ ، بتفضل ملاحقها برزالتك وتقول جوزها من حقه يضربها لو غلطت وكأنها بهيمه .

وتابع :"إطفح إنت العنب ، بس لازم تعرف وإنت بتعصر العنبايه تحت أسناك لازم تعرف إن العصير إللي أطعم من الشهد ده هو عرق البنت الشقيانه إللي محدش عارف العربيه إللي هي راكباها دي هاتوصلها لغيط العنب ولا للآخره.

لافتا :"البنت دي دورها في حياتنا أفيد كتير من دورك في حياتنا ، إمسك كده عنقود عنب وارفعه لفوق وبص له كويس هاتلاقيه بيحكي قصص وحكايات ، مآسي وعذابات ، هاتشم فيه ريحة عطرها بالرغم من إنها محرومه من إنها تتعطر وفقا لتعاليمك، روحي يا ابنتي إجمعيلهم العنب علشان يطفحوا.

يأتي ذلك بعد  حادث التصادم المأساوي على الطريق الإقليمي بالمنوفية، والذي أودى بحياة 19 شخصًا، بينهم 18 فتاة، وإصابة 3 آخرين، بعدما اصطدمت سيارة نقل تريلا بالسيارة الميكروباص التي كانت تقل الضحايا إلى عملهم في إحدى المزارع لجني العنب.