كتب: محرر الأقباط متحدون
نمر كثيراً بمواقف إنسانية رغم بساطتها لكنها تترك اثر كبير بينا، وفي السطور القادمة يحكى الإعلامى أحمد سالم عن أحد المواقف التى تعرض لها وخرج منها بعبارة وهى" ان الفقر ملوش علاقة بقلة النضافة ولا تدني الأخلاق و فيه فقراء كتير في المال لكنهم أغنياء اوي في الأخلاق.....
وقال "سالم" على موقع التواصل الاجتماعي فيسبوك "ركنت بالصدفة قدام كشك سجاير بسيط جدا عشان اشتري لبن رايب لزوم هضم أكلة ممبار ، ولقيت قطط كتير اتجمعوا و عينهم في ازازة اللبن،
طلبت طبق او علبة من صاحب الكشك عشان افضي فيهم اللبن و طلبت بسكويت لزوم فتة القطة ،بس خفت يطردهم عشان اتلموا قدام الكشك،
لكنه فاجئني بإنه مخصص لهم طبق كبير و شوال مليان دراي فوود و قاللي والله لسة آكلين كلهم يا باشا بس تقول ايه بقي في شقاوة القطط و ضحك كأنه بيتكلم عن ولاده بالظبط ،
وفعلا القطط كلها راحت علي الطبق بتاعه و اكلوا لغاية ما شبعوا.....
يمكن الحكاية تكون تافهة او بسيطة بالنسبة لناس كتير بس انا كنت سعيد جدا ان الرجل المحترم ده رغم بساطة حاله و قلة تعليمه واحتياجه لكل مليم إلا انه كان رحيم و قلبه كبير مع الحيوانات بما يؤكد النظرية اللي ضيعت عمري في اثباتها،
ان الفقر ملوش علاقة بقلة النضافة ولا تدني الأخلاق و فيه فقراء كتير في المال لكنهم أغنياء اوي في الأخلاق.
