كتب - روماني صبري
حكي الشاب (رائد جيد) موقف انساني بطله الشيخ احمد صابر، حيث قام الاخير بتوصيله بعدما اوقفه رائد وطلب منه ان يرشده للذهاب الى مكان معين في نجع حمادي، وكتب رائد عبر حسابه على فيسبوك :
بسأل الرجل الجميل دا بقوله اروح المكان الفلاني منين .. قالي اركب هوصلك، قولتله مش عايز اتعبك يا حج .. قالي انت خايف اخطفك .. مفيش تعب في طريقي .. ركبت وراه وعرفني بنفسه .. اسمه الشيخ احمد صابر شيخ معهد نجع حمادي الازهري .. وعرفته بنفسي .. اداني رقم تليفونه واخد رقمي وقالي كلمني انت وماشي اجي اوصلك .. قلتله ياربي علي الجمال.
محبتك كبيرة يا شيخ، قالي طيب ادعيلي دعوتين، قولتله ربنا يكرمك ويفرحك ويرزقك بناس حلوة زيك ويخليك للناس اللي زي حالاتي، بعد ما وصلني طلبت منه نتصور وبعدها فضل واقف معايا يقولي لما تيجي نجع حمادي تاني كلمني اوديك دير الانبا بضابا انا بحب اروح هناك .. قلتله اكيد يا حج .. قالي لما انزل طما اكلمك .. قلتله اه طبعا .. دا انت تشرفنا. ..هو الناس كلها في نجع حمادي كدا؟!.
