كتب - محرر الاقباط متحدون
عاتب المحامي والحقوقي شريف رسمي، على شحاتة المقدس نقيب الزبالين، لتبرير الاخير الاعتداء على صحفي روسي من قبل بعض اهالي حي الزبالين كونه قام بالتصوير هنام.
ووجه رسمي رسالة للمقدس عبر حسابه على فيسبوك جاء فيها :
لا يا عم شحاتة المقدس ، لاول مرة هختلف معاك يا صاحبي و انت صديق غالي و طول عمرك رجل صادق .
اولا : و مع كامل احترامي لحي الزابلين و كلهم فوق راسي لكن الصحفي الروسي اللي تم الاعتداء عليه في حي الزبالين كان في مهمة صحفية و معاه تصريح قانوني مش زي ما حضرتك بتقول علي كل القنوات انه غلطان و بيصور عشوائي بدون تصريح.
ثانيا : و ده الاهم و حضرتك بتقول عن المعتدين انهم رجالة صعايدة و يهمهم الشرف .. بذمتك ازاي مجموعة رجالة و صعايدة يقبلوا يعتدوا علي فرد بطوله و في منطقتهم ؟! .. و ايه دخل الشرف في التقاط صورة لسيدة تعمل وسط اولادها الشباب ؟! .. اعرف ان الدم الصعيدي يفور لو كان الصحفي اتحرش او عاكس السيدة.
ثالثا : بتقول الزبالين ناس وطنيين و هم فعلا وطنيين .. و كأن الصحفي الروسي جاسوس او عميل و الزباليين خايفين علي مصر .
اعتب عليك انك كررت في كل مداخلاتك ان الصحفي غلطان لانه بيصور بدون تصريح و ده مش حقيقي و انت دائما رجل صادق فالصحفي اخبرهم انه صحفي و اخدوا منه الباسبور اللي مكتوب فيه انه صحفي و قالهم انه معاه تصريح.
كون انهم مش بيعرفوا انجليزي يبقي كانوا كبروك بما انك كبير و نقيب الزبالين و جابولك الصحفي تتأكد بنفسك او تسلمه للشرطة تتحقق مش يقوموا بدور القاضي و الجلاد يا عزيزي.
طلبي منك انك تقول الحقيقة و عذرك انك قد تكون مش عارف ان معاه تصريح و ككبير تعتذر للصحفي الروسي و للشعب الروسي كله لأن الاعتذار في الخطأ من شيم الكبار و انت من الكبار يا صديقي الغالي .. مش كدة ولا ايه.
