الوردية كلها بتصلي يا فندم..
اعترض بأه لو تقدر في عالم الزومبي..
 
خالد الأسود
ناس متدينة أوي وماعندهاش مانع تزوغ من الشغل علشان تصلي ركعتين وترجع تاخد رشوة أو تعمل سبوبة وبعدين تروح تشير كام آية وكام دعاء قبل ما تتتفرج على فيلم البورنو وبعدين تصبح تتريق على حال البلد وتقعد تخترع في حلول عبيطة وهي تتحسر: فين زمن الخلافة! وآه يا عمر! حبيبي يا رسول الله..
 
ناس بتتكلم عن السلفع والحياء وما يتكسفوش ياخدوا رشوة وبعدين يزوغوا علشان يصلوا.. السلفع والحياء نختزلها في حطي طرحة واضربي الحتة الكارينا واتكسفي من الرجالة يا بت..
 
وأنت يا مؤمن قول زوجتي بدل مراتي وجزاك الله خيرا بدلا من شكرا وكفى الله المؤمنين شر الحياء..
 
الحياء شعبة من شعب الإيمان وكنا فاهمين الحياء أنه ما تجرحش مشاعر حد، ما تتلفظش بكلام بذئ وما تشتمش وما تسبش، كنا فاهمين الحياء أن الواحد يتكسف يظلم ويفتري على حد، الحياء على أيامنا أن يقوم الإنسان بواجباته علشان ماحدش يحرجه، خدناه في المدرسة أن الحياء يعني اعدل ولو على نفسك..
 
دين اللعن والسب والنكاح وحالة السعار الجنسي والبيدوفيليا خلق المتدين المعوق نفسيا المشوه خلقيا، الحياء مفهومه يتغير ويبقى منتهى غايته غطي وشك يا مرة..
 
المتدين اعتمر وحج بيت الله وماعندوش مشكلة يتحرش بطفلة، ويلاقي متدينين إخوة سلافع يقولوا أصل البنت وسلوكها وحركاتها..
المتدين ينزل يتحرش وإخوته السلافع يقولوا بس لبسها..
 
احتفالية موكب مومياوات ملوك مصر الفراعنة غيرت سلوك الناس واهتماماتهم في ٢٤ ساعة..
 
بقيت أشوف ناس بتسمع أوبرا وبتتكلم عن شفرات العرض وعلاقتها بقيم المصريين القدماء ورموزهم الحضارية بعد ما كنا داخلين ليڤل البامبرز الشرعي اللي يصون الرضيعة المحتشمة..
 
بقيت أشوف إيجابية الناس في الدفاع عن هويتهم الحقيقية الجديرة بالانتماء والتبجيل..
 
حتى محاولات المشوهين ارتدت عليهم عندما كشفنا المستور من تاريخهم وتراثهم وجعلنا جهلاءهم يعرفون ويرون ما أخفوه عنهم..
 
الدولة المصرية تملك كل كروت الوعي والانتماء..
 
معركتنا مع الإرهاب طلعت أسهل ألف مرة من معركتنا مع الإرهابيين..
 
استعدت يقيني أن نصرنا قريب، التنوير قادم، الحداثةغالبة.. طيور الظلام أكثر هشاشة مما كنت أتخيل..
 
فوجئت بجهل جمهورهم لحد لم أكن أتخيله..
 
الجهل كان سلاحهم، قريبا سيرتد عليهم..
 
لا نحتاج في معركتنا غير أن نضيء الأنوار..
 
كل اللي عمله معالي وزير النقل جيد وجميل بس مش شغلتك يا فندم، وأغبر الزمن اللي خلا الوزير يشتغل مشرف عمال..
 
عاوزين وضع سياسة تدير العمل بدون تواجدك الشخصي، عاوزين منظومة تعاقب المخطئ وتبتر المفسد وتعطي العامل أجره العادل المستحق.
 
أوقفوا برامج الشيوخ، خففوا جرعة تعاطي الدين،ليتولَّ رجال الفكر والقانون الإشراف على مراكز إعداد الدعاة..
 
التعليم ( الحقيقي ) والصحة أحق بالمليارات المهدرة على عواطلية العقل والروح وتجار الشعوذة..
احتفوا بالقيم الحقيقية للحياة: العمل والبهجة والعدل والصدق.
 
انزعوا وصاية المشعوذين عن المجتمع..
 
بدلا من الطبطبة على مدمن التدين عالجوه.
 
الدين دين والدولة قانون والخلط هلاك..
 
الحل في العمل والقيم الإنسانية: المساواة والعدل والصدق والحرية.. وما يتعارض معها جريمة.
 
المرضى والمجرمون مكانهم المصحات والسجون لا منابر الإعلام ومقاعد الوصاية.
المهزلة صارت مسخرة، المسخرة صارت جحيما، الجحيم مصيبتنا