محمد أبوقمر
شوف يا أخ علي إنت عارف طبعا معني كلمة عالم (بكسر اللام )، وزي ما إنت عارف عالم يعني شخص ( رجل أو امرأة ) رهن نفسه لخدمة الإنسانية ، يقضي عمره باحثا عن الحقيقة ، وهو بيعمل كده زي ما انت عارف بيجدد المعارف ، يبدع معارف أحدث وأكثر تطورا من المعارف السابقة وأكثر حداثة منها الأمر الذي يدفع روحا جديدة في حياة البشر ، يعني زي ما إنت عارف العالم الحقيقي بيطور حياة الناس عن طريق ابتكاره لسبل ووسائل جديدة تخلي حياة الناس أكثر سهولة وأكثر بهجة وأكثر قابلية للعيش ، يعني مثلا الراجل إللي اكتشف البنسلين ، والراجل إللي اخترع الراديو ، وإللي اخترع التليفون ، والتلفزيون ، الناس إللي اخترعت أو اكتشفت الوسائل المختلفة وطلعتنا من الحياة البدائية إللي مكنش فيها غير الخيمة والحمار والجمل والمعيز هما دول العلماء إللي بصحيح ، إسمع يا أخ علي متخليش حد يخدعك ويقولك إن الناس إللي كل شغلتها إعادة إنتاج المعارف القديمة يبقوا علماء ، إعادة إنتاج المعارف القديمة يعني بالظبط إعادة إنتاج الحياة القديمة ، وإعادة إنتاج الحياة القديمة يمنعك من فهم التطورات إللي حصلت حواليك في حياة الآخرين ، وتبقي عايش زي الغريب لا إنت عارف إنت مين ولا إنت فين ولا إنت كده ليه ، والحالة دي يا أخ علي ممكن جدا تخلق عندك حالة عداء للآخرين إللي حياتهم اتطورت بواسطة العلماء الحقيقيين إللي اكتشفوا الكهربا واخترعوا المصباح وعملوا طيارات وقطارات وعربيات وابتكروا كل ما يجعل حياتهم سهلة ونظيفة وأكثر سهولة وأكثر قابلية لتطورات أخري هائلة أعجز أنا وانت عن إدراك معناها ، شوف يا أخ علي بتوع إعادة تدوير المعارف والقيم ومجمل ما تم إنتاجه من أفكار قديمة بيضحكوا علينا أنا وانت والواد ابراهيم والبت جمالات ويوهمونا إننا أفضل من أي حد في العالم علشان نفضل عايشين بالطريقة إللي هما بيحددوها لنا ونفضل كده تايهين في عالم عمال يجري بسرعة الصاروخ وإحنا واقفين ياريت محلك سر إنما بنرجع دايما لورا .
شوف يا أخ علي إوعي تفهم من كلامي إني عايز أنا وانت والواد ابراهيم والبت جمالات نبقي مخترعين زي أديسون أو زي العلماء إللي بيخترعوا دلوقتي عقار للوقاية من كورونا ، لأ ، أبدا ، إحنا بس عايزين نعيش زمانا ، عايزن نفهم ، عايزين نتخلص من الأوهام والخرافات إللي خلتنا أنا وانت والبت جمالات عايشين في زمن وبنفكر بطريقة زمن فات وانقضي من مئات السنين ، إحنا عايشين فضيحة حضارية وتاريخية يا أخ علي وآدي إنت شايف الفرق بين إللي أنا وانت جمالات بنفكر فيه ومهتمين به وبين إللي العالم من حوالينا بيفكر ومهتم بيه ، إحنا مهتمين أوي وبنفكر ياتري يجوز الترحم علي غير المسلم ولا لأ ، وياتري غير المسلم هايدخل الجنة معانا ولا هايروح في داهية ، وياتري البت جمالات تلبس الحجاب ولا تمشي زي العاهرة راسها مكشوفة ، وياتري الواد ابراهيم حافظ دعاء الركوب ولا زي الأهبل بيركب زي التيس من غير ما يدعي ، في حين العالم من حوالينا بيتسابقوا للوصول للمريخ ، إحنا يا أخ علي بقينا فضيحة .
إسمع يا أخ علي عقائدنا وتاريخنا في عنينا من جوه وإيمانا بالله مضفر في أرواحنا وساكن في عمق خلايانا لكن ما يصحش أبدا حد يعمل علينا عالم ويفرض علينا وصايته بشوية كلام حفظهم من شوية كتب مكتوبة من ألف عام ، إحنا إيمانا بالله وبرسالته لينا هايزيد ، هايكبر ويتطور ويصبح أكثر شفافية وأكثر روحانية وأكثر إخلاصا لما يتحرر وعينا من الخرافات والأوهام ووصاية إللي عملوا من أنفسهم علماء وأولياء وخلوا أحوالنا زي ما إنت شايف لا تسر عدو ولا حبيب.
سلم لي ع الواد ابراهيم والسيد وعم عبد الجواد والبت جمالات وخالتك فوقية وكل سكان حارتنا المزنوقة.
