محمد محمود
عزيزي المزمن، عزيزتي المزمنة، قبل ما تزعل ولا تغضب وتحرق دمك وتتعصب ويجيلك تقلصات في بطنك من الغضب وانتفاخ من كتر الزعل علشان اللي حصل مع لاعب الزمالك اللي شبهوه بحيوان جميل لونه أسود، وقبل ما تبدأ تنظر علينا في المساواة وعدم التفرقة( ولتعارفوا) ، احب اقول لك انك كداب، أيوا كداب ومنافق، لأنك عنصري، بتتنفس عنصرية ومتربى على العنصرية وبتكبر وبتبقي ما شاء الله زي البغل وانت طالع على العنصرية، والمساواة بتاعتك دي جوه جماعتك وداخل قبيلتك بس، إنما خارجها، انت عنصري ومنافق.... اقول لك ازاي؟... اقول لك...
- انت عنصري لما بتقول على واحد اسمر... هو اسمر لكن قلبه ابيض ودمه شربات...
- انت عنصري لما بتقول فلان قلبه اسود... وكأن السواد علامة الكره والغل والحقد..
- انت عنصري لما بتقول لخصمك... سود الله وجهك
- انت عنصري لما بتقول.. وتسود وجوه، ولما بتقول.. اسود وجهه وهو كظيم
- انت عنصري ضد غيرك لما بتقول.. مسيحي بس اخلاق.. وكأن الطبيعي ان المسيحي بدون اخلاق
- انت عنصري لما بتقول ست بمية راجل، بينما هي ست ومش عاوزة تكون راجل ويكفيها فخرا انها ست جدعة وبس
- انت عنصري لما بتقول.. بشعرها بس محترمة.. وكأن المحجبة بس هي المحترمة
- انت عنصري لما بتقول.. مسيحية لكن مؤدبة.. وكأن المسيحية لازم تكون غير مؤدبة والطبيعي عندها ان أخلاقها مش كويسة
- انت عنصري لما تشوف شخص معاق وتقول.. الحمد لله الذي عافانا مما ابتلى به غيرنا وفضلني على كثير ممن خلق تفضيلا.. ومش بتسأل نفسك يعني ايه الكلام ده؟ وليه فضلك على غيرك وليه ابتلاه هو اصلا؟
- انت عنصري لما بتقول لغيرك وانت غضبان... هو انت يهودي يا اخي؟ ده انا حتى موحد بالله
- انت عنصري لما بتقول لغيرك... هو انا هندي؟
- انت عنصري لما بتقول لغيرك... هو انت فاكرني كروديا؟ ( كوردي يعني)
- انت عنصري لما بتغني في الأفراح... امه يهودية وابوه ارمانلي
- انت عنصري لما بتقول... فقير بس نضيف
- انت عنصري لما بتقول فلان ده مسيحي بس ذمته تمام، وكأن لازم المختلف تكون ذمته خربانة
عرفت انك عنصري ومنافق وكذاب وكل حياتك غلط في غلط وكل عيشتك كدب في كدب حتى وانت عامل نفسك إنسان محترم، انت برضوا بتكذب على نفسك...
عزيزي المزمن، عزيزتي المزمنة... بطلوا كذب
