سهير وهبه
سمعتوا عن واحده في الكتاب المقدس اسمها (دينة)
طب عرفتوا ايه اللي حصل معاها
دينة دي كانت بنت جميله وكويسه لكن اعتدى عليها واحد وذلها حكايه غريبه
تعالوا نعرفها مع بعض
دينة دي تبقي بنت يعقوب ذكرت في تكوين *34*
دينة دي تبقي البنت اللي ولدتها ليئة بعد *8* اولاد
*6* كانوا منها و *2* من الجاريه لما تقرأ تكوين *29* و *30* هتلاحظ ان كل ولد خلفته ليئه كانت بتقعد تتأمل وتصلي وتديله اسم مليان جمال وصفات
شمعون الله يسمع رأوبين الله يري وهكذا مع *8* اولاد كلهم
إلا دينة قال الكتاب *ثم ولدت ابنة ودعت اسمها دينة* نقطة وانتهى الكلام
من البداية حاسيت ان دينة دي مش في الحسبان وجودها مش فارق اوي يعني محدش ركز معاها من يوم ماتولدت
مهي بنت على *8* اولاد ومين عارف يمكن اتقلها انتي جيتي غلطة واضح ان محدش من العيلة اهتم بيها عشان مفيش ذكر واضح ليها في الكتاب قولت يمكن احساسي غلط بس في تكوين *34* اتأكد احساسي
تعالوا نشوف الكتاب بيقول ايه*خرجت دينة ابنة ليئة التي ولدتها ليعقوب لتنظر بنات الأرض فرآها شكيم ابن حمور الحوي رئيس الأرض وأخذها واضطجع معها وأذلها*. ركزوا عند كلمة *خرجت تنظر بنات العالم* اصله البنوة والانتماء لربنا مش مجرد كلام ده كمان بيحتاج جسد يعلم ويفهم ويقدم قبول واحتواء حب وتشجيع قابلها رئيس العالم رئيس سلطان الهواء اعتدى عليها وأذلها وده يجي ايه قدام بكورية النفس *احب الفتاة ولاطفها* في الوقت اللي احنا اهملناها وسطينا إبليس فتح احضانه بالموت لاطف الفتاة ما الوعاء الفاضي مكان لزبالة الغريب.
ولما عرف شمعون ولاوي قتلوا كل بن حمور لكن بعد ايه فاقوا متأخر اوي
دينة انتهت قعدت ادور في الكتاب على ذكر تاني لدينة ملقتش بس في قلب ربنا اتحفر اسمها بالدم اسم بيتردد في السما *دينة*
عارفين فيه كام دينة وسطينا كام دينة بتضيع كام دينة واقعة من اهتمامنا بعد ما وقعت من عنينا
دينة دي تبقى كل ولد وبنت في كنيستنا وعائلاتنا جف عندها ابار الحب والاهتمام
دينة دي تبقى كل ولد وبنت مفيش شئ مميز شوفناه فيهم وعزلانهم بعيونا المريضة ونرجع نهيج ونفوق يوم ما نعرف انها ضاعت وراحت مننا..فى الوقت اللي بعدم امانتنا بننساها لكن بنشوف ابليس بينصب شباكه لكل المتروكين وفي الوقت اللي بتقرأ فيه الكلام في كذا دينة نازله تنظر بنات العالم والعدد الأكبر دلوقتي تحت مذلة الإعتداء
ارجوك ياللي بتقرأ دلوقتي دور على دينة في اللي حواليك
ولو انت أو انتي حاسة انك دينة عايز اقولك انتي محبوبه ورغم عدم امانتنا كبشر لكن هو هيفضل أمين� قيمتك مش في عيون الناس قيمتك في ثمن غالي ادفع فيكي البسي ثياب عزك ثياب قيمتك الحقيقية ثياب بنوتك لربناارجوكي اوعي تسيبي بيتك وتنزلي مجدك جوه بيت ربنا
حد يسألني انت بتقولى الكلام ده ليه دلوقتي؟
جايز يكون من وجهة نظرك مش مناسب لكن انا عايز اقولك عشان بناتنا
آه اهلها بيهتموا بيها بس اهتمام جسدي أكل وشرب وفلوس تشتري اللي نفسها فيه لكن هل في اهتمام روحي؟
رسالتي نصلي لكل دينة حوالينا ده اللي في ايدينا عشان متروحش مننا
لو عندك اختك أو بنتك أو مراتك أو مامتك أو أي حد تعرفه حافظ عليها واشبعها محبة وحنان واهتمام قبل ما حد غريب يوهمها بالحب ويذلها وتنتهي بسببكم
حبيت النهاردة اقدملكم القصة دى لاجل الظروف المتكررة علينا فى هذه الايام واتمنى مننا جميعا ان نتقدم فى علاج هذه الوقائع الكارثية لان بالتأكيد لكل منا دور يجب ان يفعله والله قادر ان يخلص كل دينة في حياتنا بقوة احتواءكم للامور .. والرب معكم صباح الخير على الجميع🥰
