كتب هشام حلاوة:
النهارده اليوم العالمى للرجل الكائن الجميل البسيط الغلبان.. اللي طموحه بيبدأ عند كنبة الانتريه مرورا بطبق الفاكهه وكباية القهوه والسجاره انتهاءا بالتليفزيون ،
الكائن الهادي اللي مش عايز حاجه من حد ولا عايز حد يعوز منه حاجه ،
الكائن المقهور اللي ضيع طفولته ومراهقته في التعليم علشان يكبر ويشتغل ويضيع الباقي من عمره شايل حمل ناس تانيين ..ولا فارق معاه ولا بيشتكي ولا بيندب حظه علي كده ،
الكائن الغلبان اللي نص يومه بيروح في الشغل علشان يقبض اخر الشهر فلوس يطلعها مصاريف بيت وجمعيات واقساط وديون ،
الكائن الواضح الدغري اللي كلامه واضح وافعاله واضحه وتفسيرها سهل ومش محتاج مجهود علشان يتفهم ومش عايز حد يهتم بيه ..علشان يعرف هو عايز ايه ،
الكائن اللي عنده المكرونه زي المحشي زي السمك زي اي حاجه المهم المعده تتملي والبطن تتنفخ شويه وخلاص ،
الكائن الغير معقد اللي بيجيب اي حاجتين تلاته يحطهم علي بعض يلبسهم ويمشي الدنيا ومبيقعدش يتفنن كل شويه .
الكائن اللي مش عايز يعرف جيرانه قالو ايه وعيلة امه عملو ايه وعيلة ابوه اشترو ايه وزمايله اتجوزو مين واصحابه اتطلقو ازاي ،
الكائن اللي بيسمي الاشياء اسماء واضحه ومعروفه الكوتشي يعني كوتشي والجزمه يعني جزمه والقميص يعني قميص الابيض يعني ابيض والاحمر يعني احمر والازرق يعني ازرق..
الكائن المقتنع وراضي بشكله ولون شعره ولون عيونه ويوم مايفكر يتجمل بيجيب معجون بتلاته جنيه علشان يحول سنانه من اللون الاصفر للون الابيض ،
الكائن اللي بيعامل الناس معامله دغري مابيدورش علي ابراجهم واتولدو في الصيف ولا الخريف وطبيعي ولا قيصري علشان يقرر هيعاملهم ازاي..
المفاجأة اللي كنت سايبها للاخر ، ان الراجل مابيقولش انه نص المجتمع وانه الاب والاخ والزوج والصديق لان ده طبيعي مش محتاج ميتين ام فكاكه يعني..
كل سنه واحنا كلنا بخير وربنا معانا وحسبنا الله ونعم الوكيل.