سهير وهبه
تلميذة بولس الرسول
ورد اسمها في الاصحاح ١٦ من رسالة بولس الرسول إلى أهل رومية :
" أوصى إليكم بأختنا فيبى التى هى خادمة الكنيسة التى فى كنخريا ، كى تقبلوها فى الرب كما يحق للقديسين ، و تقوموا لها فى أى شىء احتاجته منكم . لأنها صارت مساعدة لكثيرين و لى أنا أيضًاً "

معنى اسمها منيرة أو مشرقة ..
لكن عاوزين نعرف سبب أن القديس بولس الرسول يكتب اسمها اول اسم في الاصحاح الاخير ؟! متقدمة عن كل الرجال و على شخصيات كتيرة معروفة ؟!
تعالوا ندخل في أعماق الشماسة فيبي .. و نشوف هانتعلم منها ايه ؟

*١ - فيبي المؤمنة* :
برغم انها أممية و من كنخريا و ده ميناء في كورنثوس في اليونان .. و كورنثوس كانت مشهورة بأنها بلد متحررة و فيها شرور كتير و فلسفات و بدع و هرطقات ..

لكن فيبي لما سمعت كلمات بولس الرسول آمنت بالسيد المسيح و كرست نفسها للخدمة .. فلم تتزوج .

*٢ - فيبي الشماسة* :
رتبة الشماسة مش زي الشماس و لكن هي دياكوني يعني خادمة .. و كانت بتعلم الأطفال و السيدات و تساعد في معموديتهم .. و تنظيم خدمتهم ..

*٣ - فيبي التلميذة* :
طبعا كلنا عارفين كمية التعب و الجهد اللي تعبه القديس بولس الرسول .. لأنه رسول مسكوني لف العالم كله تقريبا للبشارة بالمسيح ..
لكن فيبى قبلت التعب ده من أجل الخدمة و البركة ..

و فضلت تلف توصل الرسائل .. و تعمل أعمال كتير من أجل الكرازة ..

علشان كده استحقت إن القديس بولس الرسول يقول عنها : إقبلوها كما يحق للقديسين !!
لأنها صارت مساعدة لكثيرين و لي أنا أيضا .

تعالوا نطبق اللي اتعلمناه :
*١-* مهما كنت عايش بين ناس أشرار .. لا تنجرف للشر .. و كن مع الله حتى لو كنت انت الوحيد في العالم اللي ماشي في طريق ربنا ..

*٢-* على قدر طاقتك اخدم و ماتقولش انا معنديش موهبة ..
ربنا إدانا كلنا مواهب .. لازم نستغلها .. حتى لو افتقاد الغايب .. او تنضيف في بيت ربنا .. و ربنا ها يدينا بركة .

*٣-* التلمذة مهمة .. و الإرشاد مهم .. بنسمع صوت ربنا على لسان المرشد الروحى .. بعد الصلاة . صباح الخير على الجميع♥️