السبليتينج " splitting"

فيه مرحلة مهمة فى تاريخ نمونا النفسي.. اسمها مرحلة الsplitting.. واللى بتبدأ بعد الولادة بكام يوم، وتستمر حوالى ست شهور.. 

 

فى المرحلة دى العالم بينقسم فى عيوننا لنصفين.. نصف جيد جداً.. ونصف سئ جداً.. يعنى ماما تكون موجودة ومتاحة وقت ما احتاجها تبقى أفضل شئ فى الوجود.. ماما مش موجودة او مش متاحة وقت ما احتاجها.. تبقى أسوأ شئ فى الوجود.. 

 

زى ما يكون الواحد ماشى ومعاه صندوقين.. ده صندوق الناس والحاجات والمواقف الحلوة (فى نظرى).. وده صندوق الناس والحاجات والمواقف الوحشة (فى نظرى برضه).. ومع كل موقف أو حد جديد، باحطه إما فى الصندوق ده، أو فى الصندوق ده.. ووارد طبعاً إنى أقعد أنقل الناس من هنا لهنا والعكس.. وزى ما وضحت.. الأم نفسها بيكون فيها منها نسختين فى المرحلة دى من النمو النفسي للأطفال.. نسخة فى الصندوق الأبيض.. ونسخة فى الصندوق الأسود..

 

حلو؟

تمام..

 

المشكلة بقى مش ان العالم بيكون مقسوم نصفين فى عيون الطفل.. لا.. ده هو نفسه بيكون مقسوم نصفين جوا نفسه.. يعنى هو ذات نفسه شخصياً من جواه كائنين منفصلين عن بعض.. حد حلو.. وحد وحش.. حد حلو وقت ما يكون مبسوط وراضى وشبعان.. وحد وحش وقاسى ومدمر وقت ما يكون غضبان وحزين ومحبط.. يعنى هو كمان جواه صندوقين لنفسه.. واحد أبيض.. وواحد أسود..

 

مع التطور النفسي الطبيعى، والنمو النفسي الصحى.. يكبر عقل ووعى وادراك طفلنا الجميل.. ويفهم ان كل حد من اللى فى الصندوقين هو حد كامل متكامل غير قابل للاختزال.. يعنى نفس البنى آدم ممكن يكون فيه الكويس والوحش.. نفس الموقف يمكن رؤيته من أكتر من ناحية.. نفس الحاجة ليها جوانب مختلفة.. فيبطل يتعامل مع العالم الخارجى بمنطق التقسيم Splitting.. ويبطل يحط الناس فى صناديق.. ويقبل الأشياء والأشخاص على طبيعتها كما هى..

 

ويحصل طبعاً مع ده، انه يدرك أيضاً إنه هو برضه كل متكامل غير قابل للاختزال.. بنى آدم واحد فيه الكويس وفيه الوحش.. يقدر يشوف نفسه على أكتر من مستوى، ومن أكتر من زاوية.. ويقبل نفسه كلها على بعضها، ويتعامل بيها كلها على بعضها، ويتحرك بيها فى العالم كلها على بعضها.. دون تجزئ.. أو تقسيم.. أو شطر Splitting.

 

يحصل إيه بقى لما يقف نمونا عند مرحلة السبليتينج دى؟

هاتكون إيه النتيجة لما نفضل تتعامل مع الآخرين بمبدأ الأبيض والأسود؟

 

وإيه شكل حياتنا واحنا من جوانا مقسومين نصفين؟

بالظبط.. عليك نور..

 

هانشوف اللى حاصل دلوقت.. واللى بيحصل فى الأفراد بيحصل فى المجتمعات.. وزى ما الأفراد ليهم نمو نفسي.. المجتمعات ليها نمو نفسي.. وزى ما الأفراد ممكن يقف نموهم النفسي عند مرحلة معينة.. المجتمعات يقف نموها النفسي عند مرحلة معينة..

 

اللى حاصل يا سيدى هو إن نفس ذات الناس اللى اتفرجت وعلقت وشيرت واتبسطت وزقططت على فيديو الراقصة الشهير مؤخراً، هما هما اللى غضبوا واستشاطوا وسبوا وشتموا الكوميديان المغمور اللى سخر من بعض أصوات مذيعى إذاعة القرآن الكريم وطريقة كلامهم (وهو ما لا أقبله شخصياً).. انت حر تتفرج على الفيديو أو تغضب من الكوميديان.. بس انك تعمل الاتنين مع بعض فى وقت واحد من نفس ذات الشخص؟ ده غير مفهوم إطلاقاً..

 

واللى حاصل كمان هو إن نفس ذات الناس اللى اتفرجت وعلقت وشيرت واتبسطت وزقططت على فيديو الراقصة.. هما هما اللى بيشجعوا المُدرسة اللى أجبرت طالبة الاعدادية على ارتداء غطاء الرأس، وإلا مش هاتدخل المدرسة. انت حر برضه إنك تتفرج على الفيديو أو تواقق على تصرف المدرسة.. بس انك تكون بهاتين الشخصيتين مع بعض؟ ده غير منطقى أبداً..

 

واللى حاصل برضه هو اتفرجت وعلقت وشيرت واتبسطت وزقططت على فيديو الراقصة فى الخفاء.. وبعضهم تمناها زوجة ثانية أو عشيقة.. هما هما برضه اللى شتموها ووصفوها بالفجور والسفور والمجون فى العلن.. يا سيدى انت حر تتفرج واللا تتبسط.. أو ترفض سلوكها أو تصرفها.. بس الاتنين مع بعض؟ الاتنين من نفس البنى آدم؟ الاتنين فى نفس ذات الوقت؟ ده اسمه جنون.. جنون رسمى..

 

فاكرين فيلم الشيخ جاكسون؟ الشاب المقسوم نصفين.. نصف تقى وورع.. ونصف ماجن وجاكسون فى نفسه.. أهو ده مثال واضح لمعنى الSplitting..

سمعتوا قبل كده مصطلح Double Standards فى وصف بعض الشخصيات أو المجتمعات؟ يعنى حد عنده ازدواجية فى المعايير والمبادئ.. أهو ده تفسيره موضوع الSplitting..

 

شوفتوا اللى يتفق على معاد تسليم المخدرات بعد العشا؟ أو على معاد استلام الرشوة ويقولك إن شاء الله؟ أو كل ده وراه Splitting..

انقسام عنيف فى الشخصية..

 

انشطار داخلى أقوى من أى انشطار نووى..

اتنين مايعرفوش بعض.. متخانقين مع بعض.. غير متسقين إطلاقاً مع بعض.. عايشين فى نفس الشخص.. ونفس الجسد..

 

طب نعمل إيه؟

ماعرفش.. آه والله.. لأن دى حاجة مش على مستوى فرد أو مجموعة أفراد.. دى على مستوى ثقافة بأكملها..

 

بس أعرف إن الوعى والتعليم والعلاج هما اللى ممكن يغيروا التركيبة النفسية الأساسية للناس.. مهما كانت صعبة أو معقدة..

وعارف ان الوعى بيزيد..

 

وان التعليم بيتحسن..

وانهم العلاج فيهم هما الاتنين

ويا مسهل..

الوعى.. التعليم.. العلاج..

آه.. نسيت أقولكم..

موضوع السبليتينج ده بيحصل فى الأطفال (قبل سن 6 شهور).. وفى المصابين باضطراب الشخصية الحدية.. والمصابين بالفصام.. آه والله.. الفصام..