- الشاب الجميل ده إسمه محمد اشرف مقدم محتوى كوميدي كان في حفله من سنه ونص وطالع يهزر ويقلد اصوت ويضحك الجمهور كعادته، و الحفله خلص وكله تمام بس انبارح ظهرله دقيقه ونص مقصوصه بيتكلم فيها عن اذاعه القرآن الكريم وبيقلد أصوات معدي البرامج بطريقه فكاهية بجدها لطيفه.
- وبسرعه الفيديو تم اعتباره سخرية من الإذاعة ومعدي البرامج بل ومن القرآن ومن النبي نفسه رغم انه مقالش حرف واحد عن القرآن او النبي ولا حتي بالتلميح، وعلى الفور الجهات والأشخاص القائمه مقام الأمر بالمعروف والنهي عن المنكر اعتبرت ده على حد تعبيرها خطأ جسيم واهانه مقدسات مينفعش التهاون مع مرتكبه عشان يكون عبره للي بعد كده.
- وعلي حد معلوماتي الدين مفيهوش قدسيه لمذيعين أو محطات إذاعة، محمد في دفاعه قال "لو قلدت معلق كرة قدم هل الجماهير هتهاجمني؟ مش منطق إنى اتهاجم عشان بقلد ناس زيى زيهم"، الموضوع موقفش عند كده لا ده محمد جاله تهديدات وشتائم هو ومراته وأسرته واتهامات بالكفر والزندقه لمجرد انه قلد صوت مذيع (شخص عادي يعني لاهو نبي ولا اله) .
- فكره التكميم والتخويف والاقصاء والمنع والحذف والتجريم والعقاب على توافه الأمور سواء بدعوى قيم الأسره او الشعور الديني بتمنح أصحاب السلطه الدينيه مزيد من البطش والتسلط والتحكم في أدق تفاصيل المعيشه وتحريك العقول واللعب بها كدميه مسرح.
- محمد لا أهان معتقد ولا شئ مقدس هو فقط قدم برنامج بشكل فكاهي عن طريق تقليد أصوات بس غلطته الوحيده انه افتكر مذيعين الإذاعة بشر عاديين وزي باقي المذيعين الي قلدهم.
