ماجد سيدهم
مش حاتكلم  عن  أزمة الأطباء ولاحاتكلم أنهم أول من  دفعوا  التمن  وفي ظروف قاسية ..لكن خلينا في استهتار معاليك الأسود ..
 
في الأول  كلنا  عارفين ان الدولة وقعت في خطأ كبير جدا  في رهانها على وعي الشعب  وكان لازم  فورا  تطبيق عقوبات توجع  الجيب على اللي يخترق قوانين الحظر والوقاية  خصوصا ان الدولة ماقصرت في حملات التوعية ..
 
لأن هو حاجة من الإتنين 
ياما أنتو مغيبين. لدرجة مش عارفين الشعب اللذيذ دا  لما يتساب له الحبل على الغارب من غير أي التزام  وتتكل على  وعيه حايوصلنا  لفين  ..
أو انكوا عارفينه صح  ولعبتوا على رهان الفيرس نفسه وبكدا عفارم  عليكوا  كسبتوا الرهان ...
 
بس على فكرة  الشعب نفسه  ضحك على حكاية الوعي دي لما فطس من الضحك والزحمة   ووصل بينا  هيلا بيلا كدهو  للشلاحات  وبقينا  ٢٠مليون  مرة واحدة .. 
لأ ولسه  الوعي دا محضرلكوا  الكبيرة وحايحدي  الشلاحات انشاء الله  بصاروخ  دوغري  ..
 
فيا حضرة المستهتر اللذيذ.. كان لازم  تفهم كويس  لما دول العالم المتحضر والملتزم أوي   أزاي  الكورونا بهدلته   وأخدته وش ورا التاني .. فكان لازم تفهم  أننا هنا في المحروسة  بإمكانيتنا الفقيرة  دي  لازم  حانتشلح  ..
 
ودا التعبير اللي انتشر في بداية الأزمة لما  الناس اللي بتفهم صرخت  وقالت  الشارع اللي حاتعتمدوا على وعيه  دا حايودينا  الشلاحات يعني حانتشلح يعني كارثة غير مسبوقة .. تمام كدا 
 
تقوم حضرتك  تستخف  دمك  وتعملي فيها سبع رجالة ف بعض وانك الواد اللي مايقدر  عليه حد  ..أو أنك  المؤمن اللي مش  حايمنع قدر ربنا ومكتوبه 
 
وبقينا. نشوف  صدمة  زحام غير عادي بالشوارع  والأسواق والمحلات..وكمان بتستظرف و نازل تتظاهر   وتفطر رمضان على الكورنيش ..
 
خلاص ماتجيش دلوقت تصرخ  وتولول   وتسب  وتهين في الدكاترة والدولة والحقنا ياسيسي ..ويا حكومة (** ) ومافيش مشفيات  تستقبلنا ..الحقونا ياناس الحكومة بتموتنا ..أحنا بنموت ياسيسي .. 
 
ياإما خليك مؤمن للآخر وارضى  بالمكتوب لك يالذيذ 
 
كان لازم تعرف إن فتونة  حضرتك الأسابيع اللي فاتت  بندفع تمنها كلنا  دلوقت ..ولازم ياظريف كمان  تتوقع الأسوأ برضه نتيجة استهتارك  اللي  مغرق  الشوارع لحد دلوقت برضه 
 
ياترى  مع الزيادة المرعبة دي لسه ماتعلمتوش ...انا متأكدة انكوا حاتلتزموا  غصب عنكوا لما تلاقوا الخطر وصل  جوا البيوت ..دا مش بيرحم  ولا  دمه خفيف ..
 
بس للأسف كل اللي بنحكيه هنا أو حتى بالاعلام مابيوصلكوش خالص   ...  أيوه للأسف إحنا بنكلم نفسنا  والناس اللي  في الشوارع دي في حتة تانية خالص ..
يبقى الغرامات اللي توجع الجيب هي الحل ..دا لو عاوزين ..
 
بس أحب أفكركوا .. بالمعدل المخيف دا  ..حانعدي الشلاحات .