كتب – محرر الاقباط متحدون ر.ص 
علق الدكتور محمد علام، نائب مدير مستشفى النجيلة بمطروح، على الرسالة المؤثرة للشاب "محمد نادي" الذي غيبه الموت جراء إصابته بفيروس كورونا، والتي قال فيها :" كلمتين أول ما قدرت اكتبهم كتبتهم أنا بقالي أسبوع في العناية المركزة لان الفيروس عملي مضاعفات كتير في جسمي خصوصا الكلى والرئة ..ياما اتقالى خليك في بيتك بلاش خروج وانا ولا حياه لمن تنادي، لكني احمد الله الواحد الأحد ارجوكم بلاش استهتار لانه مرض مش سهل وقاتل وبيدمر كل حته فيك محدش بيموت من الجوع ، متغامرش بحياتك المرض منتشر جدا في مصر وخصوصا المنوفيه انا للاسف عديت اخواتي ابقى في بيتك انه قاتل لعين وادعولي من قلبكم بنيه للشفاء العاجل من هذا الفايروس اللعين فضلا وليس أمرا جزاكم الله خيرا."
 
وقال علام عبر حسابه على فيسبوك اليوم:" الله يرحمه ويسكنه فسيح جناته ويلهم أهله وذويه الصبر والسلوان، بس تعليقا على فيديوهاته وهو في المستشفى مريض قبل وفاته الناس كلها أتفرجت عليها انا شفتها كتيير فى حالات تانيه وشفتها فى نفسى وحابب اتكلم عنها .، الخوف والرعب بسبب الألم الشديد و ارتفاع درجه الحرارة بيكون شديد ومستمر وبيكون في وجع في كل الجسم وبكرر مش لكل الناس حالات قليله لكن الوجع بيكون شديد وارتفاع درجه الحرارة مستمر لأيام وده بيكسر الجسم حرفيا وبيأثر على تفكير الشخص واى شخص سواء متعلم او جاهل فاهم او مش فاهم هيحس بالخوف فى المرحله دى والخوف ده هيخلي حالته متتحسنش ايوه الخوف والرعب بيكون سبب فى ان الحاله تسوء ودايما المريض بيفكر ان ده تقصير فى الفرق الطبيه لكن ربنا الشاهد ده مش تقصير مفيش حقنه سحريه هتخففك فى لحظه لازم جسمك هياخد وقت ويتحسن ."
 
مضيفا:" رسالتي للجميع وعاوز الكل يشوفها أنا أتكلمت قبل كده في تسلسل المرض بلاش خوف  : 
 
1- بدون أعراض وده مش هتعرف ان عندك غير بالصدفه ومش هيحصلك اى حاجه مش محتاج مستشفى.
 
2- اعراض بسيطه ارتفاع درجة الحرارة او سعال جاف يوم او يومين بالكتيير وخلاص مش محتاج مستشفى.
 
3- اعراض متوسطه بيبدء يحصل التهاب رئوي بس بسيط وهتخف منه بدون اى حاجه بعض الادويه المساعده فقط احتمال تحتاج مستشفى قليل جدا.
 
4- اعراض شديده هنا الالتهاب الرئوى زاد وبردوا نسبه انك تخف منها عاليه جدا جدا وبتحتاج علاجات وبعض الجلسات والاكسجين وممكن تدخلات طبيه تانيه لازم يتعالج فى مستشفى.
 
5- اعراض خطيره ودى نسبه الوفاه فيها بتكون كبييره شويه لكن بردوا فى ناس بتعدى المرحله دى لازم عنايه فى مستشفى.
 
واختتم :" محدش يدخل على المرض وهو مسلم وخلاص انا هموت الاعمار بيد الله ونسبه انك تقوم بالسلامة كبييره جدا في نسبه للأسف هينتصر عليهم المرض لكن أحنا مفروض نحارب لحد أخر لحظه ونسبه الوفاة قليله جدا، دمتم بأمان وابعدوا اهلكم والمعرضين للمضاعفات عن الخطر.